Tragjedia në Itali, ambasada e Kosovës nuk deklaron nëse ka shqiptarë të lënduar

Ambasadorja e Shqipërisë në Romë, Anila Bitri ka deklaruar se nuk ka shtetas të Shqipërisë të lënduar pas shembjes së urës në rajonin e Ligurias, pavarësisht se ka shumë prej tyre që jetojnë në këtë rajon.

Bitri është shprehur se konsulli shqiptar i nderit në Liguria është në dispozicion për çdo ndihmë.

“Ne kemi ndjekur me dhimbje sot ngjarjen tragjike shembjen e urës, një pikë e rëndësishme që lidh rajonin e Ligurias me rrjetin e autostradave nacionale dhe ato që lidhin Italinë më tej me Evropën. Ai është një rajon që ka një popullsi shqiptare. Nuk kemi informacion që të kemi shqiptarë të humbur apo jetë të prekura në rajon. Do të presim më tej zhvillimet, identifikimin e viktimave për të pasur informacione të tjera më të detajuara”, ka thënë ajo.

Por, ambasadorja e Kosovës në këtë shtet, Alma Lama nuk ka dhënë asnjë deklaratë ende.

Madje, kjo ambasadë as që kanë dërguar ndonjë njoftim apo numër ku mund të telefonohet për të mësuar për gjendjen e shtetasve të Kosovës atje.

KosovaPress ka kontaktuar edhe me zyrtarë të MPJ-së, por ende askush nuk është deklaruar për këtë çështje.