Tollovia e krijuar te salla “1 Tetori”, MSH: Qytetarët e komunave tjera nuk kanë të drejtë vaksinimi në Prishtinë

Ministria e Shëndetësisë ka njoftuar se procesi i vaksinimit kundër COVID-19 sot vijon sipas njoftimeve paraprake.

MSh, ka kërkuar nga qytetarët që kenë parasysh se në Prishtinë në sallën “1 Tetori” vaksinohen vetëm qytetarët e Prishtinës në bazë të rekomandimeve konform Planit Shtetëror të vaksinimit.

Lexo po ashtu Tollovi e qytetarëve për t'u vaksinuar në sallën "1 Tetori", policia mban rendin

“Grumbullimet e krijuara sot para sallës “1 Tetori”, vjen si pasojë se aty kanë ardhur të vaksinohen qytetarë edhe nga komunat e tjera, përkundër njoftimeve të bëra ditëve të kaluara dhe dje se qytetarët do të vaksinohen në komunën e tyre.

Qytetarët e komunave të tjera të Republikës së Kosovës luten që t’u drejtohen qendrave të vaksinimit në komunat e tyre, me qëllim që të marrin informatat e duhura dhe të vaksinohen”, thuhet në njoftimin e MSh-së.

Ministria ka theksuar se me që vaksinimi kundër COVID-19 është proces dinamik që do të vijojë deri në vaksinimin e të gjitha kategorive të parapara në Planin e vaksinimit.

“Luten qytetarët që të përcjellin njoftimet e MSh-së dhe t’i shmangin grumbullimet para qendrave të vaksinimit përderisa mundësia e vaksinimit do të jetë e hapur çdo ditë në secilën komunë”, thuhet në njoftimin e Ministrisë së Shëndetësisë. /Telegrafi/