Thaçi: Kosova ka shënuar progres në luftimin e trafikimit të qenieve njerëzore

Presidenti i vendit, Hashim Thaçi ka thënë se Kosova ka shënuar progres në luftimin e dukurisë së trafikimit të qenieve njerëzore.

Këto komente presidenti Thaçi i bëri gjatë ceremonisë solemne të organizuar nga Ministria e Punëve të Brendshme me rastin e Ditës Ndërkombëtare Kundër Trafikimit me Qenie Njerëzore.

“Kosova si shtet i ri ka arritur të krijojë infrastrukturë ligjore që ndihmon në luftimin e trafikimit të qenieve njerëzore dhe rehabilitimin e viktimave. Duhet të punojmë çdo ditë për të siguruar mirëqenie për qytetarët tanë, që të mos ketë mundësi për zhvillimin e kësaj dukurie negative dhe të rrezikshme për shoqërinë”, tha Thaçi.

Ai shtoi se duhet parandaluar që Kosova të shfrytëzohet si rrugë për trafikantët.

“Duhet të bashkëpunojmë me të gjithë fqinjët dhe Bashkimin Evropian për parandalimin e shfrytëzimit të Kosovës si rrugë për trafikantët. Kosova ka bërë progres në të gjitha këto fusha, është bërë rishikimi i Kodit Penal, gjyqësori ka ulur numrin e rasteve të mbetura, por edhe gjykata supreme ka miratuar udhëzimet e reja për dënime…”, tha Thaçi.

Presidenti në fund u bëri thirrje të gjitha institucioneve përgjegjëse të jenë në krye të detyrës dhe të luftojnë çdo dukuri negative në shoqërinë tonë. /Telegrafi/