“Do të japim gjithçka nga vetja që Gjilani ta kalojë tutje” – Baton Zabërgja optimist para ndeshjes ndaj Progres në Ligën e Konferencës

Gjilani të enjten do të përballet me ekipin nga Luksemburgu, Progres Niederkorn, në raundin e parë kualifikues të Ligës së Konferencës.

Pasi e mbylli kampionatin si i treti dhe ishte finalist i Kupës së Kosovës, Gjilani do të kërkojë suksesin edhe në garat ndërkombëtare.

Skuadrës do t’i prijë trajneri Klodian Duro, ndërsa gjilanasit kanë në skuadër emra të spikatur si Yll Hoxha, Besar Musolli, Përparim Islami, Baton Zabërxha, Arbnor Ramadani e Egzon Sinani.

Para ndeshjes për Telegrafin ka folur ylli i Gjilanit, Baton Zabërgja, i cili ka tregtuar se skuadra ka dy ditë në Luksemburg për tu përshtatur.

“Jemi vendosur dy ditë më herët në Luksemburg për t’u ambientuar sa më mirë para ndeshjes. Normalisht që nuk do jetë e lehtë ndaj një kundërshtari që tashmë ka krijuar përvojën në garat ndërkombëtare. Megjithatë, ne kemi udhëtuar për të marr rezultat pozitiv dhe presim të zhvillojmë një ndeshje sa më të mirë”, ka thënë Zabërgja për Telegrafin.

Progres Niederkorn në vitet e fundit ka luajtur rregullisht në gara ndërkombëtare, ndërsa në sezonin 2018/19 kaloi dy raunde, duke eliminuar klube me emër si Gabala dhe Honved. Një vit më parë e kishte eliminuar Rangersin skocez.

Zabërxha thotë se e kanë analizuar kundërshtarin edhe pse këta të fundit kanë bërë ndryshime, por beson që do të marrin rezultat të mirë në ndeshjen e parë.

Lexo po ashtu Zyrtare: Gjilani konfirmon dy afrime në formë të përkohshme dhe një largim

“Jemi duke e shikuar në vazhdimësi ekipin kundërshtar, megjithëse ka pësuar jo pak ndryshime, pasi që ka marr futbollistë të rinj. Ne kemi mënyrën tonë të lojës dhe do të japim gjithçka nga vetja për ta kaluar këtë sfidë” , nënvizoi Zabërgja.

Ndeshja mes Progres Niederkorn dhe Gjilanit zhvillohet këtë të enjte nga ora 19:30./Telegrafi/