Cristiano Ronaldo, një nga ikonat më të mëdha të futbollit botëror, ka shprehur gatishmërinë e tij për të përfaqësuar Portugalinë në Kupën e Botës 2026.
Edhe pse do të jetë 41 vjeç në atë kohë, ai preferon të luajë dhe për këtë ka folur në një intervistë për Telefoot.
“Do të ishte e padrejtë për mua të them se duhet të fitoj Kupën e Botës për ta konsideruar karrierën time të suksesshme. Kam arritur aq shumë gjëra në karrierën time, dhe jam krenar për çdo moment”.
“Por nëse jam në formë të mirë fizike dhe mendore, dhe nëse kombëtarja ka nevojë për mua me afrimin e Kupës së Botës, do të jem në dispozicion”, deklaroi Ronaldo.
Kjo deklaratë vjen në një kohë kur Ronaldo është ende aktiv si futbollist, duke luajtur për Al-Nassr në Arabinë Saudite.
Pavarësisht moshës së tij, ai mbetet një figura kyçe për ekipin Kombëtar të Portugalisë, me një karrierë të mbushur me trofe dhe rekorde.
Ronaldo ka qenë pjesë e ekipit kombëtar të Portugalisë që nga viti 2003 dhe ka luajtur në pesë edicione të Kupës së Botës (2006, 2010, 2014, 2018 dhe 2022). Ai ka shënuar mbi 120 gola për kombëtaren portugeze. /Telegrafi/