Të hënën nis procesi mësimor, shkollat thonë se kanë bërë të gjitha përgatitjet për kthimin e nxënësve në klasa

Ministria e Arsimit Shkencës dhe Teknologjisë, ditë më parë ka bërë të ditur që fillimi i vitit të ri shkollor do të fillojë me 27 shtator, me prani fizike të nxënësve nëpër shkolla. E të gatshëm për këtë rikthim në shkolla u shprehen edhe drejtorët e disa shkollave në Kosovë.

Drejtori i shkollës “Model”, në Prishtinë Liridon Maliqi në një prononcim për Telegrafin, tha se me përpikëri janë angazhuar për t’i bërë përgatitjet e duhura për kthimin e nxënësve në klasa.

“Po, i  kemi bërë të gjitha përgatitjet që na përkasin neve me përpikëri, për fillimin e vitit të ri shkollor”, tha Maliqi.

Në anën tjetër ai shtoi që të gjitha masat anti-COVID, janë marrë në shkollën që ai drejton e duke përfshirë këtu edhe shpërndarjen e librave.

“Dezinfektimi i shkollës është bërë nga Komuna e Prishtinës,  por edhe ne kemi mjetet dhe materialin përkatës për dezinfektim te objektit në fund të çdo jave. Po ashtu, deri me sot kemi pranuar rreth 40% te librave (duke përfshirë brenda 60% këtu se për nivelin parafillor dhe klasat e nënta nuk do vijnë tekstet fare. Ndërsa për pjesën tjetër të librave,  e ne veçanti për klasat 3 dhe 8, presim që t’i sjellin ne ditët në vijim”, deklaroi ai.

E përgatitjet e duhura për fillimin e mësimit  janë bërë edhe në arsimin e mesëm, drejtori i gjimnazit Aleksandër Xhuvani në Podujevë, Liridon Mulliqi , tha se ata kanë qenë të gatshëm për të nisur mësimin, që nga fillimi i muajit shtator.

“Po, ne kemi qenë të gatshëm që nga fillimi i muajit shtator sipas periudhës në të cilën fillon çdo vit i ri shkollor, por edhe gjatë kësaj kohe që nxënësit nuk kanë qenë prezent në shkollë për shkak të vendimit të MASHTI dhe institucioneve shëndetësore për të mos filluar mësimi me prezencë fizike, në vazhdimësi është bërë pastrimi i hapësirave brenda shkollës nga ana e stafit teknik”, tha Mulliqi.

E përveç që dezinfektimi i shkollës është bërë vazhdimisht, ai tha se edhe gjatë vikendit është bërë dezinfektimi i hapësirës së shkollës.

“Po është bërë dezinfektimi i hapësirave të shkollës, gjithashtu është planifikuar që të bëhet edhe një here gjatë këtij vikendi para se nxënësit të kthehen në shkollë nëse vendimi i ministrisë do të jetë që nxënësit të vijojnë mësimin në shkollë. Jemi të pajisur mjaftueshëm me mjete dezinfektuese dhe me këto që kemi në dispozicion mundemi pa vështirësi të fillojmë procesin mësimor sa i përket furnizimit me mjete dezinfektuese”, pohoi ai.

Kurse, sa i përket kompensimit të orëve të humbura edhe pse janë shprehur te gatshëm, të dy drejtorët pajtohen që do  të jetë problem në vete kompensimi dhe do të ishte sfiduese si për ta si për nxënësit nëse Ministria e Arsimit do të merrte një vendim të tillë.

Ndryshe, fillimi  vitit shkollor do të duhej të ndodhte me 1 shtator si çdo fillimin vit shkollor më parë por për shkak të situatës së rënduar me coronavirus në vend, Ministria e Arsimit në konsultim me institucionet shëndetësore e kanë shtyrë një proces të tillë. /Telegrafi/