Taulant Xhaka tregon lutjen që i bëri Granitit për mos të udhëtuar drejt Serbisë: Nuk është e lehtë të qëndrosh nën kontroll për 90 minuta

Zvicra do të luajë kundër Serbisë në Ligën e Kombeve të shtunën dhe do të jetë dueli i tyre i parë pas përballjes në Kupën e Botës 2018 dhe 2022.

Të gjithë sytë janë te kapiteni i Zvicrës, kosovari Granit Xhaka, i cili madje u lut nga vëllai i tij i madh, Taulanti të mos udhëtojë për të luajtur në Serbi.

Në Botërorin e Rusisë, Granit Xhaka tregoi shqiponjën shqiptare kur shënoi gol, ndërsa në Katar 2022 gjithashtu pati konfrontime me serbët.

Vëllai i tij Taulanti është i vetëdijshëm për tensionet që mund të ketë në ndeshjen e ardhshme, madje i kërkoi Granitit të mendojë nëse duhet të luajë fare në Serbi.

“E di vetë se sa presion dhe emocione duhet të durosh në këtë ndeshje”, ka thënë Taulanti, i cili ka qenë reprezentues i Shqipërisë dhe ka luajtur në Beograd në vitin 2014.

Ai po ashtu ka treguar se menjëherë pas shortit ka marrë telefonin dhe i ka sugjeruar Granitit që të mos luajë.

“I sugjerova Granitit të fliste me trajnerin Murat Yakin dhe ndoshta ta kalonte këtë lojë, por të gjithë e njohim vëllain tim, ai dëshiron të luajë çdo ndeshje për Zvicrën”, tha Taulant Xhaka për Blick.

“Nuk është e lehtë të qëndrosh nën kontroll për 90 minuta kur gjërat bëhen përsëri kaq emocionale. Graniti duhet të qëndrojë i qetë, të luajë futboll, të fitojë dhe të injorojë provokimet. Është e lehtë të thuash, por në fund gjithçka përfundon në këtë: luaj lojë dhe fito”, ka thënë Taulanti.

Ndeshja ndërmjet Serbisë dhe Zvicrës është caktuar të shtunën dhe do të luhet në Leskovc. /Telegrafi/