Tahiri: Qeveria të reflektojë për rritjen e çmimit të rrymës, nuk ka logjik që qytetarët të paguajnë si në Paris

Shefi i Grupit Parlamentar të AAK-së, Besnik Tahiri sërish ka kërkuar nga Qeveria e Kosovës që të reflektojë karshi vendimit të ZRRE-së për rritjen e çmimit të energjisë elektrike.

Ai ka thënë se miratimi i këtij vendimi të ZRRE-së, është sulm drejtpërdrejt ndaj qytetarëve.

“Për ne më e rëndësishme në këtë kohë është që të ketë reflektim të kryeministrit dhe Qeverisë në raport me shtrenjtimin e energjisë. Nuk ka temë më të rëndësishme se kjo. Nuk ka logjikë që ai qytetar që harxhon 800 kilovat në orë të paguajë njësoj si në Paris apo në vendet e tjera të Evropës. Nuk ka asnjë logjik, vendimi i ZRRE-së dhe miratimi nga Qeveria është sulm i drejtpërdrejt ndaj qytetarëve me të hyra mesatare”, tha Tahiri.

Tahiri tutje bëri të ditur se  Kuvendi do të ketë një javë të ngjeshur me seanca parlamentare duke filluar nga sot ku do të debatojmë për energjinë.

“Pastaj do të ketë vazhdim të pikave të rendit të ditës të mërkurën, e pastaj edhe një seancë tjetër të enjten e thirrur nga opozita e nënshkruar nga LDK për menaxhimin e pandemisë”, tha Tahiri. /Telegrafi/