Sveçla publikon fakte se familja Rikalo ka qenë e mobilizuar gjatë luftës në Kosovë (Dokumente)

Xhelal Zveçla nga Lëvizja Vetëvendosje, ka folur rreth atyre që një ditë më parë ministri i Bujqësisë, Nenad Rikalo i ka thënë në sqarimin e tij, duke i quajtur akuzat sit a pabaza dhe qëllimkëqija.

Të premten ministri Rikalo apostrofoi edhe zyrtarë të Vetëvendosjes, si ish bashkëpunëtorë, kurse me Albin Kurtin deklaroi se ka punuar në ish – organizatën KAN.

Por, këtë e mohon Sveçla, i cili përmes një postimi në Facebook, thotë se aty ka qenë kryetar i Kuvendit dhe se as që bëhet fjalë se Rikalo të ketë qenë pjesë e asaj organizate.

Sveçla ka vazhduar edhe më tej, duke thënë se me ato që deklaroi Rikalo, PDK po bën iso.

Postimi i plotë i Sveçlës:

“Pleqtë thojnë që “lakmia po t’i terravke sytë”.

Për të mbajtë pushtet, e për t’u bërë kryeministra e ministra, i ashtuquajturi ‘krahu i luftës’ janë bërë bashkë me Serbinë për të kriju qeveri.

Jo vetëm kaq, por edhe me kriminelë lufte. Ndër ta edhe ministri i bujqësisë, Nenad Rikallo.

Pas dëshmive të shumë dëshmitarëve, banorë të lagjes Dardania, filluan të dalin edhe dëshmitë e para materiale. Në vend se instrumentet e shtetit të hulumtojnë e dëshmojnë, kryeministri mundohet që shpejt e shpejt të e mbyll rastin, e krimineli të gënjejë e shpif.

Unë kam qenë pjesë e KAN-it (kryetar i kuvendit të saj), dhe as që bëhet fjalë që Nenad Rikallo të ketë qenë pjesë e saj.

Ai është pjesë e qeverise, tash edhe si kriminel sipas dëshmive. E jo vetëm ai, por e gjithë familja e tij.
Në fotot mëposhtme do të shihni listën e oficerëve ushtarak rezervë të organizatës së tretë bazë ‘Dardania’ në Prishtinë, ku ndër 159 oficerëve të mobilizuar gjatë luftës, i 129-i është babai i Nenad Rikallos, Radosllavi.
Edhe të dhënat si adresa e numri i telefonit përputhen me vendbanimin e atëhershëm të tyre.

Kaq sa për jetën e qetë të basketbollistit Nenad.

Ka edhe dëshmi tjera, që është përgjegjësi primare e instrumenteve të shtetit t’i sigurojnë që Nenad Rikallo, jo vetëm të shkarkohet nga qeveria, por edhe të burgoset e dënohet nga Gjykatat tona.

Por e keqja vazhdon. Kuca e maca në PDK janë qu peshë që të shfrytëzojnë shpifjet e Rikallos për të goditë Vetëvendosje!-n dhe Albin Kurtin.

Ju po tregoni se jo vetëm në qeveri por dhe në luftë speciale të nëntokës, jeni në sinkron të plotë me Serbinë.
Nenad Rikallo, ministri juaj i bujqësisë, e thotë një të pavërtetë, e ju menjëherë i bëni iso. Pyetja e vërtetë është, a jeni bërë ju SHIK-u bashkë me BIA-në apo veç zgjatim i saj?

Jo vetëm se jeni bërë për gërdi por jeni bërë edhe për gjynah” (sic.), ka shkruar Sveçla. /Telegrafi/

Më poshtë keni disa lista të publikuara nga Sveçla, ku thotë se edhe familjarë të Rikalo kanë qenë në mesin serbëve të mobilizuar  gjatë luftës në Kosovë: