Forcat Ajrore të Finlandës, tani pjesë e NATO-s, ende valëvisin svastika në një numër të vogël flamujsh njësie - por po përgatiten t'i heqin ato gradualisht, kryesisht për të shmangur sikletet me aleatët e tyre perëndimorë, shkruan Associated Press.
Historia e përdorimit të svastikës nga forcat ajrore finlandeze, e cila që nga shekulli i 20-të është shoqëruar kryesisht me tiraninë naziste dhe grupet e urrejtjes, është më komplekse sesa në pamje të parë.
Është një simbol i lashtë dhe forcat ajrore të Finlandës filluan ta përdorin atë shumë vite para lindjes së Gjermanisë naziste, transmeton Telegrafi.
Ndryshimi ka qenë në proces prej vitesh. Një logo svastike u hoq në heshtje nga emblema e njësisë së Komandës së Forcave Ajrore disa vite më parë.
Por svastikat kanë mbetur në disa flamuj të forcave ajrore finlandeze, duke ngritur habi midis aleatëve të NATO-s, turistëve dhe të huajve të tjerë që i shohin ato në ngjarje ushtarake.
“Mund të kishim vazhduar me këtë flamur, por ndonjëherë mund të lindin situata të sikletshme me vizitorët e huaj. Mund të jetë e mençur të jetohet me kohën”, u citua të ketë thënë kolonel Tomi Böhm, kreu i ri i forcës së mbrojtjes ajrore Karelia Air Wing, në një raport të enjten nga transmetuesi publik YLE.
Forcat e Mbrojtjes, në një email drejtuar Associated Press të premten, thanë se një plan për të rinovuar flamujt e njësive të forcave ajrore u lansua në vitin 2023, vitin kur Finlanda iu bashkua NATO-s, por thanë se nuk ishte e lidhur me bashkimin me aleancën.
Qëllimi, tha ajo, ishte “të përditësohej simbolika dhe emblemat e flamujve për të pasqyruar më mirë identitetin aktual të Forcave Ajrore”.
Ai iu referua një artikulli në të përditshmen Helsingin Sanomat të premten, i cili tha se arsyeja për heqjen ishte një perceptim se svastika ka qenë një “simbol i turpshëm në kontekste ndërkombëtare”.
Finlanda, e cila ndan një kufi të gjatë me Rusinë, iu bashkua NATO-s në prill 2023 për shkak të shqetësimeve në lidhje me pushtimin në shkallë të plotë të Ukrainës nga Rusia.
Teivo Teivainen, profesor i politikës botërore në Universitetin e Helsinkit, tha se flamujt në fjalë u prezantuan në vitet e 50-ta dhe sot valëviten nga katër njësi të Forcave Ajrore.
Forcat Ajrore dhe publiku finlandez në përgjithësi kishin këmbëngulur për vite me radhë se svastikat e përdorura në forcat ajrore të Finlandës "nuk kanë të bëjnë fare me svastikën naziste", tha Teivainen, i cili këtë muaj botoi një libër, titulli finlandez i të cilit përkthehet si "Historia e Svastikës".
Por tani, pas integrimit të Finlandës në NATO, politikëbërësit kanë vendosur se "tani ekziston nevoja për t'u integruar më shumë me forcat e vendeve si Gjermania, Holanda dhe Franca - vende ku svastika është qartë një simbol negativ", tha ai. /Telegrafi/
