Sulmi në zemër te të rinjtë, çfarë shkakton dhe si mund të parandaloni

Zemra megjithëse është një nga organet më të fuqishme e të rëndësishme të të gjithë organizmit, njëkohësisht është edhe shumë e ndjeshme ndaj problemeve.

Problemet me të nisin që nga shtrëngimet e lehta, e deri tek atakët kardiakë, të cilët mund të jenë një rrezik shumë shqetësues për jetën.

Ataku në zemër mund të prekë këdo e në çdo moshë nëse nuk tregohet kujdesi i duhur. Sipas ekspertëve, sulmi në zemër vepron ndryshe në organizmat më të rinj dhe ndryshe në ata më të moshuarit.

Si ndikon në organizëm

Njihet si një ndër sëmundjet më të rrezikshme për jetën dhe zakonisht shfaqet te të moshuarit.

Gjithsesi të dhënat tregojnë që as të rinjtë nuk janë imunë ndaj kësaj sëmundje apo gjendje që trupi kalon.

Këtë rrezik organizmi e përkthen ndryshe në trupa dhe mosha të ndryshme dhe kjo mund të jetë një pikë shumë e rëndësishme për të nisur me kujdesin.

Sipas një studimi të publikuar në Revistën Amerikane të Kardiologjisë, të cilit i referohet AgroWeb.org, trajtimi i atakëve ndryshon në varësi të moshës së pacientit.

Në këtë studim u përfshinë rreth 8.500 persona me histori të atakëve në zemër nga mosha 50 deri në 90 vjeç.

Mbi 20 për qind e këtyre pjesëmarrësve ishin në moshën 56 dhe 64 vjeç, ndërsa 2/3 ishin në moshat 65 dhe 84 vjeç.

Pjesa tjetër e tyre rreth 6 për qind ishin më të rinj se mosha 55 vjeçare ndërsa 5 për qind ishin mbi moshën 85 vjeçare.

Nga të gjithë këta grupe personash u mblodhën të dhëna si për gjendjen shëndetësore ashtu edhe për jetën e tyre pas sëmundjes.

Diferenca mes moshave

Diferencat më të mëdha u panë midis pjesëmarrësve më të rinj poshtë 55 vjeç dhe atyre më të moshuarve mbi 85 vjeç.

Pacientët më të rinj ishin të gjinisë mashkullore, mbipeshë dhe me një jetë të përditshme shumë stresues.

Për shkak të sëmundjes shpesh pacientët në moshë të re megjithëse nuk kanë shumë rrezik të vdekjes nga kjo sëmundje, përjetojnë më shumë probleme me zemrën.

Ndërsa për më të moshuarit sipër moshës 85 vjeç, numri më i madh i të prekurve rezultoi të ishin të gjinisë femërore me probleme të tensionit të lartë apo veshkave.

Gjetjen e këtij studimi treguan se ataku në zemër nuk është një sëmundje që prek vetëm personat e moshuar, por edhe ata të rinj.

Duke krijuar kështu vështirësi afatgjata në jetesën e përditshme si dhe degradimin e sëmundjes gjatë viteve.

Si ta parandaloni

Për të rinjtë, parandalimi i sëmundjes është çelësi i një jetese të gjatë sipas ekspertëve.

Për ta bërë këtë mjafton të filloni me mbajtjen në formë të trupit tuaj.

Obeziteti renditet si një nga problemet më shqetësuese ndër moshat e reja dhe një rrezik potencial për prekjen nga taku në zemër.

Këshillohet rritja e cilësisë së jetës që përkthehet në aktivitet fizik të vazhdueshëm, një ushqyerje të shëndetshme dhe menaxhimin e stresit.