Sulm me thikë në Norvegji, një student plagosi dy profesorë në universitet

Dy persona janë plagosur – njëri prej tyre në gjendje kritike, ndërsa tjetri ka lëndime të lehta – pas një incidenti të dhunshëm me thikë në Majorstua, në veriperëndim të Oslos.

Sipas mediave të huaja, përcjell Telegrafi, menaxheri i operacioneve Tor Gulbrandsen ka konfirmuar se dy të plagosurit janë profesorë në Universitetin e Oslos (UiO) dhe se autori është një student.

Personi në fjalë është arrestuar dhe Gulbrandsen thotë se duket se ka pasur një lidhje me dy profesorët.

Pak para orës 19:00, policia deklaron se pas ngjarjes një burrë rreth të 20-ave është akuzuar për tentativë vrasjeje.

Rektori i UiO, Svein Stølen ka thënë se menaxhmenti është i vetëdijshëm se ka pasur një incident me thikë në një ndërtesë të lidhur me universitetin, ku dy nga punonjësit e tyre u plagosën.

“Është e trishtueshme dhe serioze që po e përjetojmë këtë në UiO”, thotë ai dhe shton se po mendojnë për të gjithë të prekurit.

Rektori beson se gjëja më e rëndësishme që ata mund të bëjnë tani është të kujdesen për stafin dhe studentët. /Telegrafi/