Souloukou niset për në Londër për t’u takuar me Chelsean rreth Lukakut

Drejtoresha e Përgjithshme e Romës, Lina Souloukou thuhet se ka fluturuar për në Londër, ku do të takohet me Chelsean për të diskutuar për Romelu Lukakun, raportojnë mediat në Itali.

Sulmuesi belg ka refuzuar të kthehet në Inter dhe ka një marrëveshje me Juventusin, por bardhezinjtë duhet të shesin Dusan Vlahovic për të nënshkruar me sulmuesin belg.

La Gazzetta dello Sport dhe Il Tempo bëjnë të ditur se Roma gjithashtu po e vëzhgon me vëmendje 30-vjeçarin që dëshiron të vazhdojë karrierën e tij në Evropë dhe nuk dëshiron të shkojë në Arabinë Saudite.

Lexo po ashtu Mourinho telefonon Lukakun, dëshiron ta ketë nën urdhrat e tij

Sipas të dyja gazetave, drejtoresha e Romës, Lina Souloukou, është në Londër dhe pritet të takohet me Chelsean për të diskutuar një transferim të mundshëm për ish-yllin e Interit.

Megjithatë, TMW thekson se Roma mund ta përballojë Lukakun vetëm nëse Chelsea e dërgon atë në huazim duke paguar një pjesë të pagës së tij, të cilën Blutë kishin refuzuar ta bënin më herët në afatin kalimtar të verës gjatë negociatave me Interin dhe Juventusin.

Objektivi kryesor i Romës për sulmin mbetet Duvan Zapata, por kolumbiani thuhet se nuk është i sigurt për t’u bashkuar me Giallorossët nga Atalanta. /Telegrafi/