Sonte shfaqet në Gjilan një nga veprat më të njohura të teatrit bashkëkohor

Sonte do të luhet premiera e shfaqjes “Togeri nga Inishmori” nga Martin McDonagh, në teatrin e qytetit të Gjilanit.

Regjia e shfaqjes është realizuar nga regjisori Shkelzen Berisha, i cili sjell këtë vepër të fuqishme dhe provokuese për publikun kosovar.

“Togeri nga Inishmori” është dramë tronditëse dhe e mbushur me humor të zi. Shfaqja gjithashtu trajton tema të forta përmes dialogeve të mprehta dhe situatave të papritura, të cilat janë karakteristikë e stilit të McDonagh.

Këtë e thotë aktori, Ernest Zymberi.

“‘Togeri nga Inishmori’ është një dramë tronditëse dhe njëherësh e mbushur me humor të zi, që ka fituar zemrat e kritikëve dhe publikut në të gjithë botën. Ngjarja zhvillohet në një ishull të vogël irlandez, ku konflikti politik dhe personalitetet ekscentrike ndërthuren në një histori që prek thellë çështjet e identitetit dhe hakmarrjes”, ka shkruar Zymberi.

Ai thekson se një prej linjave më të fuqishme të dramës është kur një nga personazhet kryesore thotë “Të gjithë jemi të çmendur në një mënyrë apo tjetër, por disa prej nesh janë thjesht më të sinqertë për këtë.”

Sipas tij, kjo linjë sintetizon thellësinë dhe kompleksitetin e personazheve të dramës, të cilët luftojnë me demonët e tyre të brendshëm dhe me realitetin e dhunshëm që i rrethon.

“Premiera e ‘Togeri nga Inishmori’ është një ngjarje e rëndësishme kulturore për Gjilanin dhe për të gjithë dashamirësit e teatrit në Kosovë. Pritet që shfaqja të tërheqë një audiencë të gjerë dhe të krijojë diskutime të gjalla mbi tematikat e trajtuara”, ka shkruar ai.

Ai ndër të tjera bën thirrje për qytetarët që të mos e humbasin këtë mundësi unike për të përjetuar një nga veprat më të njohura të teatrit bashkëkohor.

“Mos e humbisni këtë mundësi unike për të përjetuar një nga veprat më të njohura të teatrit bashkëkohor e që vjen sonte përmes lojës së jashtëzakonshme të aktorëve të Teatrit të Gjilanit.

Shfaqja përdor skena të dhunshme, krisma armësh dhe rekomandohet për një audiencë +16”, ka thënë ai. /Telegrafi/.