Skandali “partygate”, komiteti britanik gjen se Johnson mashtroi qëllimisht parlamentin për shkeljen e masave të atëhershme të COVID-19

Një raport i ri ka gjetur se ish-kryeministri britanik Boris Johnson mashtroi qëllimisht parlamentin për shkeljen e masave të rrepta kufizuese ndaj COVID-19 gjatë kohës kur ishte në pozitë, duke thënë se veprimet e tij përbënin “një mbyllje të qëllimshme të mendjes së tij ose përbënin sjellje të pamatur”.

Komiteti i Privilegjeve të Parlamentit ka shpenzuar 14 muaj duke hetuar sjelljen e Johnsonit mbi skandalin “partygate” një seri tubimesh në Downing Street duke thyer rregullat e COVID-19 që qeveria kishte vendosur në vend, transmeton Telegrafi.

Siç raportohet, komiteti e kishte për detyrë të zbulonte nëse Johnson kishte gënjyer parlamentin për këto evente, në cilat ai u akuzua se kishte marrë pjesë, pavarësisht se e dinte se ato shkelnin rregullat e atëhershme të bllokimit.

Komiteti, që heton çështjet e mospërfilljes që përfshijnë deputetët, theksoi gjithashtu se Johnson gënjeu atë dhe të gjithë Parlamentin, dhe rekomandoi që t’iu mohohej hyrja në Dhomat e Parlamentit.

Johnson, 58-vjeçar, dha dorëheqje të premten nga pozita e deputetit britanik pasi komisioni e informoi paraprakisht se do të sanksionohej.

Ai e përshkroi komitetin prej shtatë anëtarësh – që përfshinte konservatorët në pushtet ashtu edhe anëtarët e partisë opozitare – si “të padrejtë”.

Midis gjetjeve të tjera, raporti i panelit shkruan se nëse Johnsoni nuk do të jepte dorëheqje me efekt të menjëhershëm, anëtarët e komitetit do t’ia rekomandonin që të pezullohet nga parlamenti për 90 ditë. /Telegrafi/