Siguria në Kosovë, sulmet ndaj Policisë dhe shërbimi i detyrueshëm ushtarak – gjithçka nga intervista me kryetarin e Komisionit për siguri

Kryetari i Komisionit për Siguri, Bekë Berisha në emisionin “Përballje” në Telegrafi.com ka folur për situatën e sigurisë, sulmet ndaj Policisë dhe shërbimin e detyrueshëm ushtarak.

Deputeti i AAK-së në intervistën me kryeredaktorin Muhamet Hajrullahu ka komentuar edhe takimin e fundit mes kryeministrit të Kosovës, Albin Kurtit dhe presidentit të Serbisë, Aleksandar Vuçiq, në Berlin, për të cilin ka thënë se është “mashtrim” i radhës.

Ky takim për deputetin opozitar ishte i pritshëm, pasi sipas tij, kryeministri Kurti ka shkelur rreth 100 premtime të dhëna në fushatë – madje edhe atë “jo negociata me Serbinë”.

Madje, Berisha ka thënë se në takimin e fundit në Berlin “mund të thuhet edhe që (Kurti e Vuçiq) kanë qenë me thikë duke e ndarë Kosovën”.

“Me thënë të drejtën, ky takim ishte i pritshëm për mua, por kjo bie në kundërshtim me krejt atë që kryeministri Kurti ka thënë për 20 vite se bisedimet nuk i ka prioritet. Tash po del që i ka prioritet dhe po del që bën me ngrënë drekë me Vuçiqin. Dita ditës për çdo premtim që e ka dhënë po vetë-demantohet sepse njerëzit e mbajnë mend çka ka thënë ai më parë. Po vetë-demantohet për diku 100 premtime që i ka dhënë. Mund të thuhet edhe që kanë qenë me thikë duke e ndarë Kosovën. Ndoshta ka pasur edhe hartë diku, por që e kanë fshehur kur është bërë fotoja”, ka deklaruar ai në emisionin “Përballje”.

Berisha ka theksuar se partitë opozitare duhet të angazhohen më shumë për ta shpëtuar vendin nga kjo situatë, të cilën ai e ka quajtur të vështirë.

“Tash po dihet që ky njeri ka mashtruar. S’ka nevojë me i thënë mashtrues (Kurtit), por vetëm e bën krahasim se çfarë ka thënë për një temë të caktuar dhe del krejt e kundërta. Por, tash duhet me ja fillu me bë opozitën për ta shpëtuar vendin sepse jemi në një pozitë shumë të keqe”, është shprehur Berisha.

Lexo po ashtu Po thyen çdo premtim, Berisha për takimin e Kurtit me Vuçiqin: Mund të thuhet se me thikë ishin duke ndarë Kosovën

“Në fillim kur Ramush Haradinaj kur i ka thënë mashtrues (Kurtit), ishte njëfarë ‘gjendje shoku’ për qytetarët. Por, ai është mashtrues, sepse ka arritur me mashtru krejt popullin, ua ka hapë një dritë në fund të tunelit dhe populli i besoi që ka me luftu korrupsionin dhe nepotizmin, që s’ka me shku në negociata me Serbinë, pra ka dhënë premtime të jashtëzakonshme. Por, tash po del që kjo qeveri nepotizmin e ka pikë numër një. Pastaj, korrupsioni është shumë më i theksuar se më herët. Pra, korrupsioni tash ka lulëzuar”.

I pyetur se a mendon që Qeveria Kurti do të arrijë t’i përmbushë premtimet e dhëna në fushatë, Berisha është shprehur me bindje se nuk do të mundet.

“Njerëzit janë të zhgënjyer. Më nuk ka rëndësi as çfarë premtimesh ka dhënë sepse po shihet që asnjë punë nuk e ka bërë. Edhe këtë virgjërinë morale që e ka pasur e ka prishur ambasadori Martin Berishaj me atë hajninë 600 milionëshe. Berishaj është shoku i vetëm i kryeministrit Kurti dhe ky njeri u pa se kush është”, ka përfunduar ai.

Berisha ka folur edhe për shërbimin e detyrueshëm ushtarak, duke thënë se nuk do të bëhet.

“Kjo çështje veç i bashkohet atyre premtimeve që do të vetë-demantohet më vonë. Pra, nuk do të bëhet. Ne aspirojmë të anëtarësohemi në NATO. Ndërsa, shërbimi ushtarak i obliguar është vetëm një premtim elektoral i Kurtit dhe i bashkohet rrenave të mëparshme”, tha deputeti i AAK-së.

Ai shtoi se jo vetëm këtë premtim, por as të tjerët që i ka dhënë kryeministri Kurti nuk do t’i realizojë. Dhe në fund, tha se do të dalë “mashtrues”.

Kryetari i Komisionit për Siguri ka folur edhe për sigurinë vend, duke thënë se nuk ka asgjë për t’u shqetësuar.

Berisha deklaroi se në fillim të agresionit rus në Ukrainë ka pasur një lloj frike për destabilizim edhe në Kosovë, por se tani, sipas tij, zona e konfliktit është lokalizuar dhe s’ka arsye për panik.

Madje, deputeti opozitar i luti sidomos gazetarët dhe analistët që “të mos i terrorizojnë njerëzit”.

Sa i përket sulmeve të vazhdueshme ndaj zyrtarëve të Policisë së Kosovës në veri të vendit, Berisha tha ato kanë ardhur nga grupet kriminale që kanë operuar në atë pjesë, si shenj pakënaqësie që u janë mbyllur rrugët ilegale.

Lexo po ashtu Siguria në Kosovë, Berisha: Nuk është për t’u shqetësuar, policia në veri u sulmua nga grupet kriminale pasi iu mbyllën rrugët ilegale

“Duhet me pas kujdes së pari në kualifikime, pra si ja vendos emrin një pune që ka ndodhur. Në atë pjesë kanë funksionuar shumë grupe kriminale. Kur janë mbyllur ato rrugë ilegale kanë filluar pakënaqësitë”.

Deputeti i AAK-së foli edhe për përplasjet me ministrin e Punëve të Brendshme, Xhelal Sveçlën në Komisionin për Çështje të Sigurisë dhe Mbrojtjes, të cilin disa herë e pati quajtur “zoti Sfeklla”.

Madje, në një nga mbledhjet e Komisionit, ministri Sveçla dhe drejtori i Përgjithshëm i Policisë së Kosovës, Samedin Mehmeti, patën lëshuar sallën ende pa nisur raportimin para deputetëve që janë pjesë e këtij komisioni.

Por, Berisha në emisionin “Përballje” tha se ky rast ka qenë thjesht një keqkuptim.

“Rasti specifik më shumë ka qenë një keqkuptim. Unë kam kërkuar që ministri të vijë njëherë të raportojë në komision e pastaj drejtori i policisë, dhe ata kishin ardhur të dy sepse si duket nuk e kanë ditur se nuk bën ashtu. Kërkesa ka qenë zyrtare, por gjithçka më pas është sqaruar”, deklaroi ai.

Në këtë intervistë, Berisha komentoi edhe takimin e fundit mes kryeministrit të Kosovës, Albin Kurtit dhe presidentit të Serbisë, Aleksandar Vuçiqit, në Berlin, për të cilin tha se është “mashtrim” i radhës. /Telegrafi/