Përgatitja e duhur e lëkurës në moshë është thelbësore për një grim të përsosur. Zbuloni si formulat e lehta dhe produktet e synuara ndikojnë në qëndrueshmërinë dhe freskinë e grimit tuaj
Një lëkurë e shëndetshme dhe e pastër është baza e çdo rutine të mirë grimi - kjo filozofi vlen për të gjitha moshat. Megjithatë, me kalimin e kohës, lëkura jonë ndryshon, prandaj edhe rutina e përgatitjes para aplikimit të grimit duhet të përshtatet, në mënyrë që rezultati të mbetet i përsosur.
Përgatitja e duhur e lëkurës mund të bëjë një ndryshim të madh, qoftë për një grim glamuroz për ndonjë rast të veçantë apo për një pamje natyrale, të përditshme. Krijimi i një rutine të re nuk është i ndërlikuar kur ndiqni udhëzimet e duhura. Ja rekomandimet tona:
Pse është e rëndësishme përgatitja e lëkurës?
Përgatitja e lëkurës në moshë para grimit bën ndryshimin më të madh në mënyrën si duket grimi, sa i freskët dhe i lëmuar do të jetë.
Lëkura e hidratuar i bën rrudhat më pak të dukshme, duke ulur rrezikun që grimi të grumbullohet ose të duket i thatë. Një përgatitje e mirë përmirëson gjithashtu qëndrueshmërinë e grimit. Ky është hapi që përcakton nëse pamja juaj do të mbetet e freskët apo e copëzuar që në mesditë.
Përdorimi i produkteve të kujdesit rutinë, të përshtatura me shenjat e plakjes – aplikimi shtresë mbi shtresë për ta zbutur, mbushur, hidratuar dhe mbrojtur lëkurën, nuk është vetëm i rekomandueshëm, por i domosdoshëm, transmeton Telegrafi.
Produktet që duhen shmangur
Pilingjet e ashpra dhe eksfoliantët fizikë mund të shkaktojnë irritim. Ato gjithashtu mund të gërvishtin sipërfaqen e lëkurës, duke shtuar teksturë të panevojshme.
Kremrat kërkojnë përzgjedhje të kujdesshme. Vajrat e rëndë nën pudër zakonisht bëjnë që produktet të rrëshqasin. Çdo produkt që nuk përthithet brenda 10 minutash ka shumë gjasa të jetë tepër i rëndë për fytyrën. Rekomandohet gjithashtu të shmangen primerët që mbushin poret ose ato matifikues, sepse mund të theksojnë strukturën e lëkurës në moshë.
Produktet që duhen përdorur
Një rutinë e mirë përgatitjeje gjithmonë fillon me lëkurë të pastër. Hapat bazë janë të thjeshtë: pastrim, piling, hidratim dhe mbrojtje (SPF).
Te lëkura në moshë, këto hapa mund të përmirësohen me produkte të synuara. Një pastrues dhe piling i butë janë zgjedhje ideale për ta mbajtur lëkurën të pastër dhe të paprekur. Produktet e pasura me antioksidantë janë perfekte për lëkurën në moshë, sepse ndihmojnë në ndriçimin e tonit dhe mbrojtjen nga radikalet e lira.
Serumet me acid hialuronik ose peptide janë një element kyç pasi ndihmojnë në hidratim dhe mbushje të lëkurës. Produktet që përmbajnë ceramide, peptide ose niacinamide janë gjithashtu shumë të dobishme.
Qëllimi është që lëkura të jetë e ushqyer, e lëmuar dhe gati për grim. Prandaj, aplikimi shtresë mbi shtresë i formulave të lehta është thelbësor – produktet duhet të përthithen, jo të qëndrojnë në sipërfaqe.
Para aplikimit të SPF-së, mos harroni kujdesin shtesë për zonën nën sy (kremi antirrudhë është i domosdoshëm). Anashkalimi i këtij hapi mund të bëjë që grimi të grumbullohet në vijat rreth syve. /Telegrafi/
