Si e ktheu Robert Fico Sllovakinë në një nga aleatët e Rusisë?

Robert Fico, kryeministri sllovak që u qëllua me armë zjarri së fundmi, ka udhëhequr një ndryshim duke e drejtuar Sllovakinë nga vlerat properëndimore drejt mbështetjes ruse, që nga fitorja e tij në zgjedhjet e shtatorit të kaluar.

Popullisti i krahut të majtë e ka drejtuar partinë e tij Smer fuqishëm kundër mbështetjes ushtarake për Ukrainën, duke u zotuar se do të ndalonte furnizimet me armë për Kievin.

“Është më mirë të negociosh për paqe 10 vjet dhe të ndalosh operacionet ushtarake, sesa të lihen rusët dhe ukrainasit të vrasin njëri-tjetrin edhe për 10 vjet”, tha Fico.

Por, tradicionalisht Smer është përqendruar ndaj të qenit më e butë ndaj presidentit rus, Vladimir Putin, me kryeministrin që bënte thirrje për t’i dhënë fund sanksioneve ndaj Rusisë.

Ai ka përfituar edhe nga pikëpamjet e sllovakëve për të vazhduar të jenë pjesë e NATO-s, me vetëm 51 për qind të popullsisë që e dëshiron këtë gjë, shkruan yahoonews, përcjell Telegrafi.

Gjithashtu, rreth 60 për qind e sllovakëve të moshës 25 deri në 64 vjeç janë shprehur se duan të ndalojnë furnizimin e Ukrainës me armë.

E fitorja zgjedhore e Ficos kishte ngjallur frikën e një kthese nga Bratislava në mbështetje të Ukrainës, pasi paraardhësi i tij e furnizoi Kievin me municion dhe i pranoi mijëra refugjatë ukrainas. Megjithatë, ndodhi krejt e kundërta.

Lexo po ashtu Vendi në prag të luftës civile nga tensionet politike, paralajmëron ministri i Brendshëm i Sllovakisë

I lindur në Sllovakinë veriperëndimore në vitin 1964, Fico për herë të parë u zgjodh deputet në vitin 1992 për Partinë e Majtë Demokratike, pasardhësen e Partisë Komuniste.

Pas kalimit në Smer, ai i fitoi zgjedhjet e vitit 2006 dhe shërbeu si lider nga viti 2012 deri në vitin 2018 kur edhe dha dorëheqje pas krizës së shkaktuar nga vrasja e gazetarit Jan Kuciak.

Që nga pushtimi rus në shkallë të plotë i Ukrainës, ai është afruar me Viktor Orbanin e Hungarisë, lider ky mjaft miqësor ndaj Putinit.

Siç raportohet, Fico “e urren” Ukrainën sepse ai u detyrua të priste më shumë se tre orë në Kiev në vitin 2009 për një takim me homologun e tij ukrainas.

Më pas ai u zemërua kur zbuloi se gazetarët ishin ftuar në atë që ai mendonte se do të ishte një takim privat.

“Pas takimit, ai fluturoi për në Moskë dhe që nga ai moment filloi të marrë një pozicion të hapur anti-ukrainas”, tha Alexander Duleba, analist i politikës së jashtme sllovake.

Ndryshe, Fico në mars të vitit 2024 u përplas publikisht edhe me ambasadorin britanik në Sllovaki, i cili kishte kritikuar udhëheqësin sllovak për qëndrimin e tij ndaj Ukrainës. /Telegrafi/