Të kuptuarit e shenjave dhe dhembshuria ndaj grave që luftojnë me plagët e tyre emocionale është hapi i parë drejt lirisë së tyre të brendshme dhe lumturisë së vërtetë
Lumturia nuk është vetëm buzëqeshja në fytyrë apo jeta e bukur në rrjete sociale. Shpesh ajo është e fshehur, diku thellë në sy, në gjeste dhe në mënyrën se si një person sillet në shoqëri. Një grua që nuk është e lumtur, e lënduar ose emocionalisht e rraskapitur, zakonisht dërgon sinjale të heshtura, por të pamohueshme.
1. Energji e tërhequr dhe mungesë spontaniteti
Një nga shenjat e para të pakënaqësisë së brendshme është energjia e tërhequr, e rezervuar. Në shoqëri, ajo mund të duket sikur është fizikisht e pranishme, por mendërisht diku larg. Rrallë qesh me të vërtetë, përgjigjet i ka të shkurtra dhe pa entuziazëm, dhe pothuajse kurrë nuk merr iniciativën për bisedë. Një grua e lënduar shpesh ka frikë të tregojë emocion të sinqertë, sepse dikur, kur u hap, u plagos.
2. Qasje kritike ndaj vetes dhe të tjerëve
Gratë që nuk janë të lumtura shpesh janë tepër vetëkritike dhe kërkuese ndaj vetes. Kjo kritikë, në shoqëri, mund të shfaqet ndaj të tjerëve përmes komenteve të vogla, vërejtjeve ose qëndrimeve pasive-agresive. Nuk është qëllim i keq, është pasqyrim i zhgënjimit të brendshëm dhe ndjenjës së pafuqisë. Në vend që të kërkojë gëzim dhe lidhje, ajo “mat” botën rreth saj me filtrin e pakënaqësisë së vet, transmeton Telegrafi.
3. Distancë emocionale dhe frikë nga intimiteti
Një grua e lënduar shpesh krijon një mur të padukshëm emocional. Ajo nuk i tregon mendimet, ndjenjat apo frikërat e saj të vërteta, sepse druhet se do të lëndohet ose refuzohet. Kjo mund të duket si ftohtësi apo mosinteresim, edhe pse në brendësi ka një dëshirë të thellë për afërsi dhe mirëkuptim. Ky frikë nga intimiteti rrjedh nga plagë, zhgënjime ose padrejtësi të mëparshme.
4. Kontroll i tepruar dhe gjykim i emocioneve
Një grua që nuk është e lumtur përpiqet të kontrollojë çdo reagim të vetin. Buzëqeshja mund të jetë perfekte, por jo e sinqertë; e qeshura mekanike; lotët – të shtypur. Nevoja për kontroll shfaqet në analizimin e çdo situate, kërkimin e “sjelljes së duhur” dhe vlerësimin kritik të gjithçkaje që ndodh rreth saj. Kjo është mënyra e saj për t’u mbrojtur nga plagët e reja.
5. Gëzim i përkohshëm dhe momente të rralla ngrohtësie
Megjithatë, një grua e lënduar nuk është e mbyllur përgjithmonë. Herë pas here, në një ambient të sigurt, ajo tregon buzëqeshje të sinqertë, të qeshura që vijnë nga zemra dhe butësi ndaj të tjerëve. Këto momente janë të çmuara, tregojnë se dhimbja nuk është e përhershme, por një fazë që ajo e mban derisa të mësojë të çlirohet përsëri.
Si ta njohim dhe si ta mbështesim
E rëndësishme është të mos gjykojmë. Një grua e lënduar nuk “zgjedh” të jetë e ftohtë ose e distancuar, kjo është pasojë e dhimbjes së pashprehur dhe përvojave të vështira. Mbështetja, durimi dhe vëmendja e sinqertë mund të ndihmojnë në thyerjen e murit të saj. Ndonjëherë mjafton një bisedë e thjeshtë, një fjalë e saktë ose një gjest i vogël kujdesi që ajo të ndiejë se është parë, e kuptuar dhe e vlefshme.
Pakënaqësia e brendshme është e vështirë, por jo e pakthyeshme. /Telegrafi/
