Shtyhet seanca ndaj Nrecajt që akuzohet për vrasjen e gruas dhe vajzës, negociohet për pranim të fajësisë

Pjetër Ndrecaj i akuzuar për vrasje të bashkëshortes dhe vajzës së tij ka dalë sot para Gjykatës Themelore në Gjakovë.

Pas leximit të aktakuzës nga prokurori Agron Matjani, i akuzuari Ndrecaj nuk është deklaruar rreth fajësisë, apo pafajësisë së tij për veprat që i ngarkohen nga ana e prokurorit.

Mbrojtësja e Ndrecajt, avokatja Fehmije Zhubi në fjalën e saj deklaroi se ajo nuk ka komunikuar ende me të mbrojturin e tij dhe kërkoi që seanca  të shtyhet. Ajo kërkoi nga gjykatësi Gëzim Pozhegu që seanca të shtyhet.

Lexo po ashtu Dyshime se prokuroria nuk hetoi ankesat e Valbona Nrecajt për dhunim seksual

“Unë si mbrojtëse sipas detyrës zyrtare nuk kam pasur mundësi që të komunikoj me të mbrojturin tim për këtë çështje. Mirëpo sot para këtij shqyrtimi kam biseduar me të mbrojturin tim që të kërkojmë që të shtyhet kjo seancë me qëllim të kërkimit të negocimit të kësaj çështje rreth pranimit të fajësisë. Mendoj se gjykata duhet të na mundësojë që konform dispozitave të kodit, të na ipet mundësia për kushtet rreth pranimit të fajësisë”, tha avokatja Zhubi.

Ndërsa i akuzuari Pjetër Ndrecaj tha se pajtohet me avokaten e tij. Prokurori Agron Matjani thotë se për këto negociata ju duhet kohë.

Lexo po ashtu Apeli lë në paraburgim burrin që vrau gruan dhe vajzën në Gjakovë

Gjykatësi Gëzim Pozhegu ju dha kohë një javë për marrëveshjen rreth pranimit të fajësisë.

Ndërsa, mbrojtësi i familjes së dëmtuar, avokatit Isa Osdautaj e kundërshtoi propozimin e mbrojtjes së të akuzuarit.

Pas kësaj gjyqtari Gëzim Pozhegu, duke u bazuar në kërkesën e mbrojtëses së të akuzuarit Pjetër Ndrecaj vendosi që seanca e sotme të shtyhet për një kohë të caktuar prej 7 ditësh, derisa të arrihet kjo marrëveshje. Seanca e radhës është caktuar për datë 31 tetor. /kallxo.com/