Shtatëvjeçari rrëzohet nga kati i tetë i ndërtesës, banorët e shpëtojnë duke e pritur me batanije (Video)

Një djalë i vogël në jugperëndim të Kinës ka shpëtuar mrekullisht edhe pse është rrëzuar nga kati i tetë i ndërtesës – dhe kjo falë fqinjëve që menduan një ide kreative për ta shpëtuar nga më e keqja.

7-vjeçari është filmuar duke qëndruar i varur në dritaren e katit të tetë në qytetin Chongqing, ndërsa banorët ishin të shpejtë duke e marrë një batanije të madhe të cilën e shfrytëzuan si “jastëk” mbi të cilin mund të binte dhe të shpëtonte, transmeton Telegrafi.

Por, presioni dhe shpejtësia e madhe e rrëzimit bëri që batanija të shqyhet dhe vogëlushi të përfundon në tokë, megjithatë pasi është dërguar me urgjencë në spital është konstatuar se ka pësuar lëndime të lehta trupore.

Për fat të mirë banorët e zonës e kishin vërejtur vogëlushin më herët, dhe kështu patën kohë të mjaftueshme që ta marrin batanijen dhe ta shfrytëzojnë si “jastëk” për ta amortizuar rrëzimin e djaloshit me fat.

Megjithatë, ende nuk dihet se si djali ka përfunduar i varur në dritaren e katit të tetë, ndërsa policia kineze ka njoftuar se ka filluar hetimet për këtë incident të tmerrshëm. /Telegrafi/