Shpresë për të burgosurit e rastit ‘Monstra’

Juristët vlerësojnë se pas vendimit të Supremes për rastin ‘Monstra’, të gjithë të akuzuarit duhet të mbrohen në liri. Jeton Shasivari vlerëson vendimi për rigjykim dëshmon se rasti në fjalë ka qenë i montuar politik, policor e gjyqësor. Sipas tij, ligji për mbrojtjen e dëshmitarëve do të ndihmonte në zbardhjen e shpejtë të këtij rasti.

“Në ditët në vijim pritet që të filloj rigjykimi për këtë rast të montuar politik, policor dhe gjyqësor dhe opinioni është në pritje të një rrjedhe ndryshe të procedurave , për në kthesë jo e vetëm në procedurën gjyqësore por edhe në hetime të reja nga prokuroria publike për këtë rast . Mendoj se fillimin e ri gjykimit gjykata kompetentë penale të vendos ne favor të këtyre personave pasi që nuk ekziston baza ligjore për mbajtjen e këtyre personave ne paraburgim dhe aq me tepër kur edhe vet prokuroria publike nuk është e bindur dhe nuk është e sigurt për fajësinë e këtyre personave për vrasjen e pesëfishtë në vitin 2012”, deklaroi për Alsat M profesor Jeton Shasivari.

Ish prokurori Jovan Trpenovski vlerëson se në rigjykim duhet të dënohen kryerësit e vërtetë të veprës. Sipas tij Gjykata në fazën e parë duhet të vendosë nëse do t’i lirojë të akuzuarit apo do t’i mbajë në paraburgim.

“Tani me shfuqizimin e vendimit kthehemi në shkallën gjegjësisht në rigjykim, ku shkalla e parë do të duhet të vendos, nëse këta persona që janë akuzuar e kanë bërë veprën penale. Nuk kemi dilema se vepra penale është kryer, dhe është normale tani të shihet se kush është kryerësi i veprës dhe të jepet dënimi. Tani gjykatësi duhet të sjell vendim se në çfarë drejtimi ti drejtoi hetimet dhe cilat fakte ti pranoj rishqyrtoj dhe eventualisht të pranoj dëshmi të reja që të vërtetohet se kush është kryerësi i veprës. Për mua paraburgimi afatgjatë është gjëja më e keqe çka mund ti ndodh njeriut për shkak se ardhmëria e tij nuk duhet të varet nga gjykata efikase, dhe gjykata patjetër do të duhet të jenë efikase dhe patjetër do të duhet të mbaj llogari për kohëzgjatjen e procedurës”, tha Jovan Trpenovski, ish prokuror.

Grupi i gjykatësve në Gjykatën Supreme i ngarkuar për vlerësimin e lëndës “Monstra” pas rrethanave shtesë që dolën nga përgjimet votoi pro rikthimit të “Monstrës” në Gjykatën Themelore. Për vrasjen e pesëfishtë në liqenin e Smillkovës në vitin 2012, me burg të përjetshëm u dënuan 6 persona nën akuzën për vepër terroriste.