Tashmë kanë filluar shenjëzimet vertikale dhe horizontale në të gjitha rrugët në veri të Mitrovicës.
Por, disa prej tyre janë përlyer ende pa përfunduar punimet, shkruan Telegrafi.
Shefi i operativës rajonale në Mitrovicën e Veriut, Petrit Fejza, për Telegrafin ka thënë se ende nuk dihet se kush i ka përlyer dhe se rasti është nën hetime.
"Rasti është nën hetime, nuk mund të them asgjë", ka thënë Fejza.
Këto shenjëzime janë duke u vendosur me ngjyrë të gjelbër dhe të bardhë ngase në këtë formë simbolizohet "Trepça", kështu ka deklaruar shefi i kabinetit të kryetarit të Komunës së Mitrovicës Veriore, Visar Syla.
"Frymëzimi ka ardhur sepse ngjyra e gjelbër dhe e bardhë janë ngjyrat e 'Trepçës', Mitrovicës dhe minatorit", ka thënë Syla për Telegrafin.
Ndërsa për përlyerjen e shenjëzimeve, ai u shpreh se institucionet janë duke e bërë hetimin e rastit.
"Në momentin që dihet se kush e ka bërë institucionet i marrin veprimet e tyre", ka shtuar Syla.
Vlen të theksohet se pranë ekipit punues ishin të pranishëm edhe disa zyrtarë policor.
Komuna e Mitrovicës Veriore dje ka njoftuar për nisjen e shenjëzimeve vertikale dhe horizontale në rrugët e qytetit.
Sipas njoftimit, ky hap synon rritjen e efikasitetit në komunikacion dhe krijimin e një mjedisi më të rregullt për këmbësorët dhe drejtuesit e makinave. /Telegrafi/
Shenjëzimet në veri të përlyera, më 07.03.2025. Foto: Blinera Mehmeti/Telegrafi
