Në një intervistë për BBC-në, Kuçi tha se Serbia po kryen ndërhyrje në sovranitetin e Kosovës dhe në punët e brendshme të saj. Ai tha se qytetarët serbë në veri janë viktima të raporteve Kosovë-Serbi dhe po mbahen peng të perceptimeve të Serbisë për Kosovën dhe rajonin.

“Mendoj se qasja në tërësi e Serbisë për Kosovën po e vështirëson këtë. Veriu është pretekst për rritjen e tensioneve. Serbia ka një tendencë të frenimit të tërësishëm të zhvillimeve pozitive në Kosovë dhe pastaj në mungesë të një kapaciteti për tërë Kosovën po vepron në veri më shumë apo më pak”, tha Kuçi.

Zëvendëskryeministri është shprehur se qeveria e Kosovës nuk do të heqë dorë nga zbatimi i një strategjie për veriun dhe theksoi se institucionet në Prishtinë janë të obliguara që të shtrijnë autoritetin në veri por në bashkërendim të plotë me faktorin ndërkombëtar.
“Për aq sa gjendja në atë pjesë është se nuk dominon rendi dhe ligji, për aq sa nuk kemi ushtrimin e plotë të sovranitetit tonë, për aq do të ketë mundësi apo shkëndija për tensionime. Prandaj vetë gjendja është e tensionuar dhe jo veprimet e dikujt tjetër sepse ato vetëm mund ta rrisin shkallën e tensionimit. Unë jam i bindur se veprimet e Serbisë po krijojnë iluzion tek popullata lokale serbe atje dhe në veçanti do të thosha po krijon dilema a të integrohen në institucionet tona apo jo”, shtoi zëvendëskryeministri.

Ndërkohë, përfaqësues të opozitës në Kosovë i kanë akuzuar autoritetet në Prishtinë për moszbatim të, siç thonë, kushtetutës së vendit në gjithë territorin e saj dhe kanë vlerësuar se incidenti në Mitrovicë përçon porosi të mosdurimit ndëretnik dhe të ndarjes së Kosovës. /BBC/Telegrafi/

KosovëLajme