Secili e do rikthimin e “Rikthimit…”, pos regjisorit!

Regjisori Robert Zemeckis ka tentuar t’i jap fund aventurës së re të personazhit Marty McFly, por 71 për qind e amerikanëve duan vazhdimin e “Rikthimit në të ardhmen”. Dhe, atë që populli do, populli e merr, shkruan për Guardian, kritiku Stuart Heritage, transmeton Telegrafi.

“Back to the Future” (Rikthim në të ardhmen) kishte gjithçka, apo jo? Nostalgji, aventurë, makina tërheqëse dhe një urrejtje të ashpër për popullin e Libisë. Në fakt, asnjë film tjetër kurrë nuk do t’ia dalë të krijojë një nxitje dopamine si “Rikthimi në të ardhmen”. Me përjashtim të, e dini pra, të versionit të ri të “Rikthimit…” të cilin secili po e kërkon.

Sipas një sondazhi të ri të realizuar nga Hollywood Reporter, 71 për qind e 2,201 të anketuarve kërkojnë një version të ri të “Rikthimit në të ardhmen”. Gjithkush e di se ribërjet janë mënyra se si shfaqen instinktet qyqare të Hollivudit. Pra, edhe nëse ribërja e “Rikthimit…” do të ishte për Justin Bieberin që sillet me një hoverbord Swegway, tek pi cigare magjike elektrike që e çon në kohën kur jeni të vjetër, kjo është ajo që njerëzit e duan dhe kjo është ajo që njerëzit do të marrin.

Natyrisht, Robert Zemeckis mund t’i ketë dhënë fund ribërjes së “Rikthimit…”, teksa i tha një ueb-faqeje italiane të quajtur “Bad Taste” se “nuk do të ketë, në asnjë mënyrë, ‘Rikthim në të ardhmen 4’. Nuk do të ketë më ‘Rikthim në të ardhmen’. Pikë.” Por, kjo s’ka lidhje, sepse Hollivudi e merr atë që Hollivudi e kërkon.

Për t’i dhënë kuptim anketës, të paktën ata që u anketuan e zgjodhën një film që ka qenë gjatë rreth nesh për të merituar një ribërje. Disa nga rezultatet tjera, si “The Hunger Games”, kanë qenë për pak vite në terren. Por, ka arsye për ta dyshuar sondazhin me një mostër kaq të vogël të të anketuarve; 53 për qind e të intervistuarve thonë se do të donin të shihnin më shumë filma “Avatar”, që na bënë të besojmë se sondazhi iu dërgua secilit person në Tokë që ka dëshirë të shoh më shumë filma të tillë.

Ndonëse po bëhem cinik, sondazhi i plotë i Hollywood Reporterit është mjaft i matur, sidomos kur bëhet fjalë për James Bondin. Të anketuarit dhanë mendimin e tyre për çdo film të 007-shit, ku më i dashuri ishte “Goldfinger” e më i papëlqyeri “Moonraker”. Ndërkaq, kur u pyetën për karakterin e ardhshëm: 29 për qind miratuan një James Bond me ngjyrë, 20 për qind duan një Bond femër, 19 për qind një hispanik, 17 për qind aziatik e 15 për qind homoseksual. Por, sondazhi po ashtu tha se Pierce Brosnan ishte më i mirë se Daniel Craig, se George Lazenby ishte më i keqi, se 32 për qind e njerëzve e mbështetën fuqimisht idenë neveritëse të një James Bondi amerikan… dhe lartë është poshtë e poshtë është lartë dhe askush nuk e di asgjë.

Ka shumë gjëra për t’u analizuar, por nuk ka dyshim se ky sondazh do të ofrojë një mënyrë për të modeluar dekadën e ardhshme të filmbërjes. Në ndërkohë, dikush le ta mat Justin Bieberin për një xhaketë portokalli (që vishte Marty McFly). Do të ketë nevojë për të. /Telegrafi/