Sacchi: Gattuso ia ka kthyer dinjitetin Milanit

Arrigo Sacchi e ka lavdëruar Gennaro Gattuson duke thënë se legjenda e Milanit ka arritur t’ia kthejë dinjitetin skuadrës aktuale të Rossonerëve.

“Lëndimet po i shkaktojnë telashe Milanit, por skuadra duhet ta shikojë Juven në sy dhe të mos shfaqë kurrfarë frike”.

“Nuk them që ata duhet të nisin nga fillimi dhe të bëjnë presion që nga sulmuesit, por as që të qëndrojnë prapa dhe të mbrohen. Duhet të zhvillojnë një ndeshje të baraspeshuar, ashtu siç janë të aftë lojtarët e Gattusos”.

Lexo po ashtu Lajmet për Milanin

“Rino është një fenomen, sepse ia kthen Milanit shpirtin. Njëherësh e bën ekipin e tij të luajë mirë dhe të bëjë futboll pozitiv. Të vetmet elemente që i mungojnë skuadrës së tij, është pakëz ritëm dhe më shumë presion”.

“Gjëja e mirë është se këta djem nuk dorëzohen kurrë dhe vazhdojnë t’i fitojnë ndeshjet në sekondat e fundit. Rino është një person që e jep jetën për futbollin dhe lojtarët e tij”.

“Gattuso e ka rikthyer dinjitetin e një skuadre që e kishte humbur, ai i ka bërë lojtarët të kuptojnë se çfarë do të thotë të jesh te Milani”, ka thënë Sacchi për La Gazzetta dello Sport.

Në këtë xhiro, Rossonerët luajnë kundër kampionit dhe liderit të Serie A, Juventus. Ndeshja zhvillohet të dielën në San Siro. /Telegrafi/