Saadi Gaddafi: Djali i ish-udhëheqësit të Libisë lirohet nga burgu – u nis menjëherë me aeroplan për në Stamboll

Autoritetet libiane kanë liruar Saadi Gaddafin, djalin e ish-udhëheqësit Muammar Gaddafi, i cili u rrëzua dhe u vra gjatë një kryengritje të vitit 2011, sipas raporteve të mediave.

Sipas Al Jazeera, përcjell Telegrafi, 47-vjeçari u nis menjëherë me një aeroplan për në Stamboll, tha një burim zyrtar për agjencinë e lajmeve Reuters të dielën.

Gjatë kryengritjes së vitit 2011, Saadi Gaddafi iku për në Niger, por u ekstradua në Libi në vitin 2014 dhe që atëherë është burgosur në Tripoli.

Ish-futbollisti profesionist u akuzua për krime të kryera kundër protestuesve në vitin 2011 dhe për vrasjen e trajnerit libian të futbollit Bashir al-Rayani në vitin 2005.

Ai u lirua nga akuzat për vrasjen e al-Rayani në prill të vitit 2018.

Një burim në zyrën e prokurorit i tha agjencisë së lajmeve AFP se “kryeprokurori kërkoi, disa muaj më parë, për ekzekutimin e vendimit në lidhje me Saadi Gaddafi sapo të ishin plotësuar të gjitha kushtet e kërkuara”.

Ai ishte i lirë të qëndronte në vend ose të largohej, shtoi burimi.

Libia ka pësuar kaos, përçarje dhe dhunë në 10 vitet që nga kryengritja. Përveç Muammar Gaddafit, u vranë edhe tre djemtë e tij.

Një armëpushim në vitin 2020 i dha fund luftimeve fraksionale dhe hapi rrugën për bisedimet e paqes dhe formimin e një qeverie kalimtare në mars. Zgjedhjet janë planifikuar për në dhjetor.

Një burim zyrtar i tha Reuters se lirimi i Saadi Gadafit rezultoi nga negociatat që përfshinin figura të larta fisnore dhe kryeministrin Abdul Hamid Dbeibeh.

Një burim tjetër i tha agjencisë se negociatat përfshinin edhe ish -ministrin e Brendshëm Fathi Bashagha.

Në korrik gazeta New York Times tha se kishte intervistuar vëllain e Saadit, Saif al-Islam Gaddafi, i cili mbahej prej vitesh në qytetin Zintan, pasi mbështetësit e tij tregojnë se ai do të kandidojë në zgjedhjet e ardhshme presidenciale. /Telegrafi/