Aktori dhe komediani britanik Russell Brand, 50 vjeç, është zyrtarisht akuzuar nga Policia Metropolitane për përdhunim, përdhunim oral, sulm të pahijshëm dhe dy sulme seksuale ndaj katër grave, për ngjarje që thuhet se kanë ndodhur midis viteve 1999 dhe 2005.
Brand, i cili jeton në Florida, pritet të paraqitet në Gjykatën e Magjistraturës së Westminsterit më 2 maj.
Akuzat pasuan një hetim të përbashkët mediatik në vitin 2023 nga The Sunday Times, The Times dhe Channel 4, shkruan DailyMail.
Ai ka mohuar të gjitha akuzat, duke deklaruar se marrëdhëniet e tij kanë qenë gjithmonë “konsensuale”.
Brand, i njohur për karrierën e tij në radio, televizion dhe filmat e Hollivudit, ka qenë më parë i martuar me këngëtaren Katy Perry dhe më pas me Laura Gallacher, me të cilën ka tre fëmijë.
Ai është shfaqur së fundmi në një event fetar në SHBA, duke folur për lidhjen e tij të re me besimin e krishterë.
Policia u bën thirrje të gjithë personave që kanë informacion ose janë prekur nga rasti të kontaktojnë autoritetet, ndërsa Prokuroria kërkon që të respektohet procesi gjyqësor dhe e drejta për një gjykim të drejtë. /Telegrafi/
