Rusia akuzohet për gjuajtje të ‘armëve’ nga sateliti që mund të ‘kërcënojnë paqen në hapësirë’

Mbretëria e Bashkuar dhe SHBA kanë akuzuar Rusinë për nisjen e “një predhe të ngjashme me armë” nga një satelit në hapësirë.

Sipas medieve të huaja, përcjell Telegrafi, në një deklaratë, kreu i drejtorisë hapësinore në Mbretërinë e Bashkuar tha: “Ne jemi të shqetësuar nga mënyra me të cilën Rusia testoi një nga satelitët e saj duke lëshuar një predhë me karakteristikat e një arme”.

Deklarata tha se veprime si kjo “kërcënojnë përdorimin paqësor të hapësirës”.

Dhe siç shkruan BBC, SHBA më parë ka ngritur shqetësime për këtë satelit rus.

Në deklaratën e tij, zv. Marshalli Harvey Smyth, kreu i drejtorisë hapësinore në Mbretërinë e Bashkuar, tha: “Veprime si kjo kërcënojnë përdorimin paqësor të hapësirës dhe rrezikojnë të shkaktojnë mbeturina që mund të përbëjnë një kërcënim për satelitët dhe sistemet hapësinore nga të cilat varet bota”.

“Ne i bëjmë thirrje Rusisë që të shmangë çdo testim të mëtejshëm. Ne gjithashtu i kërkojmë Rusisë të vazhdojë të punojë në mënyrë konstruktive me Mbretërinë e Bashkuar dhe partnerët e tjerë për të inkurajuar sjelljen e përgjegjshme në hapësirë”.

Po sipas BBC, kjo nuk është hera e parë që Mbretëria e Bashkuar ka bërë akuza në lidhje me “testimin e armëve” ruse në hapësirë, thotë korrespodenti i mbrojtjes i BBC, Jonathan Beale, dhe vjen vetëm disa ditë pasi një hetim tha që qeveria e Mbretërisë së Bashkuar “nënvlerësoi keq” kërcënimin e paraqitur nga Rusia.

Incidenti, siç vlerësohet më tej, do të shtojë shqetësimet për një garë të re të armëve në hapësirë, shtoi ai, duke thënë se kombet e tjera po hetojnë gjithashtu teknologji që mund të përdoren si armë në hapësirë.

SHBA tha që sistemi satelitor rus ishte i njëjti për të cilin ngritën shqetësimet në vitin 2018 dhe në fillim të këtij viti kur SHBA e akuzuan atë për manovrime afër një sateliti amerikan.

Për këtë incident të fundit, Gjeneral Jay Raymond, i cili kryeson komandën hapësinore amerikane, tha se kishte prova “se Rusia kreu një provë jo destruktive të një arme anti-satelitore me bazë hapësinore”.

Ai tha se Rusia “injektoi një objekt të ri në orbitë” nga një satelit.

Gjeneral Raymond shtoi: “Kjo është dëshmi e mëtutjeshme e përpjekjeve të vazhdueshme të Rusisë për të zhvilluar dhe testuar sisteme të bazuara në hapësirë dhe [është] në përputhje me doktrinën ushtarake të botuar të Kremlinit për të përdorur armë që mbajnë në rrezik asetet e hapësirës amerikane dhe aleate”. /Telegrafi/