Rukiqi i LDK-së thotë se Kurti manipuloi me shifra në intervistën për Bloomberg

Anëtari i Kryesisë së Lidhjes Demokratike të Kosovës (LDK), Berat Rukiqi, ka reaguar pas intervistës së kryeministrit Albin Kurti për Bloomberg.

Në pyetjet e gazetares për çështjet specifike, Kurti ka thënë se në Kosovë janë shtuar vendet e punës për 18 për qind prej se e ka marrë ky pozitën e kryeministrit dhe se ka pasur rritje ekonomike çdo vjet nga 6 për qind.

Rukiqi tha se Kurti ka shtrembëruar realitetin e përformancës së dobët te ekonomisë, duke ”zbuluar” indikatorë ekonomik që nuk i njeh as teoria e as praktika.

“Duke qenë i vetëdijshëm për përkeqësimin e indikatorëve ekonomik (rritja ekonomike nen mesataren e viteve të pas shpalljes së pavarësisë, çmimet e larta, rritja e varfërisë, ulja e eksporteve, miliona euro dëme nga sanksionet, etj), në vitin 2022 dhe 2023, në dy vitet e plota të (mos) qeverisjes se tij, kryeministri i vendit del dhe manipulon publikisht në kanalin prestigjioz Bloomberg, duke shtrembëruar realitetin e përformancës se dobët te ekonomisë, duke ”zbuluar” indikatorë ekonomik që nuk i njeh as teoria e as praktika”, tha ai.

Lexo po ashtu Kurti për “Bloomberg”: Nuk e kthejmë pas dhe as nuk ndërhyjmë në vendimin e pavarur të BQK-së për dinarin

Madje, Rukiqi ka treguar edhe shembuj se si sipas tij, ka manipuluar Kurti.

“Ja si manipulon (nga padituria apo pamundësia për te treguar ndonjë rezultat): I mbledh % e rritjes ekonomike në tri vitet e fundit dhe na e prezanton totalin (16%) si rritje ekonomike. Rritja ekonomike reale është krahasim i një viti me vitin bazë, e jo akumulim i % te viteve të ndryshme, e as mesatare e viteve që na konvenojnë, për të dalë rezultate me të mira”, shkroi Rukiqi në Facebook./Telegrafi/