Rokas: Shteti i së drejtës dhe administrata publike janë fushat ku ka ngecje në reforma

Ambasadori i BE-së Michalis Rokas njoftoi sot se në cilat fusha dhe institucione Maqedonia ngec më shumë në agjendën e saj të reformave.

“Do të thosha dy fusha ku duhet të fokusohemi më shumë: shteti i së drejtës dhe administrata publike. Nevojitet një administratë publike kompetente që mund të zbatojë të gjitha reformat. Ne po punojmë shumë për sundimin e ligjit dhe e dimë se është një prioritet i lartë. Vitet e fundit ka stagnuar dhe prandaj duhet të kemi hapa konkretë përpara dhe t’i kemi shumë shpejt”, tha Rokas në një konferencë për media në Qeveri së bashku me ministrin e Çështjeve Evropiane, Orhan Murtezani.

Për situatën në gjyqësor dhe interpelancat e anëtarëve të Këshillit Gjyqësor, ambasadori i BE-së thotë se po e përcjellin nga afër situatën.

Ai thotë se janë bërë një numër i madh rekomandimesh se si duhet të bëhen reformat në gjyqësor, veçanërisht për Këshillin Gjyqësor.

“Qëndrimi ynë është se çdo gjë që mund të shihet si ndërhyrje në pavarësinë e gjyqësorit dhe funksionimin e Gjykatës së Lartë është një çështje që na shqetëson. Të gjithë e dimë se arsyet ligjore të shpërbërjes nuk kanë të bëjnë me interpelancën. Është një procedurë e ndryshme. Ne duam që përmes reformave që presim të shohim një gjyqësor të fortë për të luftuar korrupsionin në vend, i cili është prioriteti i parë”, tha ndër të tjera Rokas./Telegrafi/