Robertson tregon se Mane gjobitej rregullisht te Liverpooli pas thyerjes së rregullave të klubit

Ylli i Senegalit, Sadio Mane ishte lojtar që shpesh pranonte gjoba të mëdha gjatë kohës që luante për Liverpoolin.

Mane i dha fund në verë periudhës së tij gjashtëvjeçare të mbushur me trofe në Anfield, pasi përfundoi një transferim te skuadra gjermane, Bayern Munich.

Gjatë kohës së tij në Merseyside, Mane bëri 269 paraqitje për Liverpool, duke shënuar 120 gola. Sulmuesi u zhvillua në një nga lojtarët më të mirë në botë dhe fitoi trofe si Liga Premier, Liga e Kampionëve, Kupa FA dhe Carabao Cup.

Megjithatë, tani është zbuluar nga ish-shoku i tij i skuadrës, Andy Robertson, se Mane është gjobitur disa herë për harrimin e pasaportës së tij për udhëtime jashtë qytetit të Liverpoolit.

“Disa nga gjobat janë të shtrenjta. Nëse harroni pasaportën tuaj për një udhëtim jashtë qytetit, do t’ju hiqet një pjesë e madhe e pagës”.

“Ka ndodhur disa herë, Sadio Mane ishte një fajtor i madh për këtë dhe padyshim që vononte aeroplanin dhe vononte arritjen tonë. Na u desh të vendosnim një gjobë të madhe”, ka thënë mbrojtësi skocez për podkastin We Are Liverpool.

Robertson zbuloi gjithashtu se kapiteni i klubit, Jordan Henderson dhe zëvendës-kapiteni James Milner janë ata që janë përgjegjës për sistemin e gjobës.

Që kur Mane u largua nga Liverpool, djelmoshat e Jurgen Klopp kanë luftuar për të zëvendësuar jo vetëm golat e tij, por ndikimin e tij në ekip.

Liverpooli aktualisht është në vendin e nëntë në tabelën e Ligës Premier me 29 pikë, 10 pikë prapa Manchester Unitedit të vendit të katërt dhe 21 pikë pas liderit të ligës, Arsenalit.

Ekipi i Kloppit do të përballen me Brighton këtë fundjavë, ndërsa kërkojnë të vazhdojnë mbrojtjen e tyre të trofeut të FA Cup. /Telegrafi/