I riu nga Belgjika thyen rregullat e karantinimit, ikë nga policia me skuter dhe përplaset në furgonin e zyrtarëve policor – humb jetën

Gjatë vikendit të kaluar në Bruksel është krijuar një situatë e tensionuar pas vdekjes së një 19-vjeçari.

I riu i identifikuar vetëm si Adil, kishte thyer rregullat e karantinimit. E derisa po shëtiste me skuter, policia është munduar ta ndalë, por Adili ka ikur prej tyre, transmeton Telegrafi.

Megjithatë, aty u alarmuan shumë patrulla që ishin në terren dhe kështu duke ikur është përplasur në një furgon të policisë, duke mbetur i vdekur në vend të ngjarjes.

E ky rast ka shkaktuar reagime të ashpra të qytetarëve, të cilët pavarësisht se u ndalohej të organizonin tubime publike, kishin dalë në masë për të protestuar kundër aksionit të policisë.

Gjatë protestës policia ka arrestuar 43 persona dhe ka arritur të shpërndajë turmën që ishin të dhunshëm.

“Nuk kemi ndërhyrë menjëherë, kemi ndërmarrë masat e duhura sapo pamë që masa po bëhej e dhunshme dhe mbanin gurë në dorë. Të gjithë ata që kanë dalë në rrugë dhe kanë hedhur gurë ,nuk e kanë bërë për t’u solidarizuar me familjen e Adilit”, ka deklaruar shefi i policisë, Patrik Evenpul, derisa familjarët e Adilit u kanë bërë thirrje qytetarëve të jenë gjakftohtë.

Belgjika i është nënshtruar masave të rrepta të karantinimit që nga 14 marsi. Kufijtë e këtij vendi janë mbyllur, kurse banorëve u mundësohet të lëvizin vetëm brenda vendit. /Telegrafi/