Reshjet e borës, Komuna e Drenasit kërkon shmangien e daljeve të panevojshme

Komuna e Drenasit ka bërë thirrje që qytetarët të shmangin daljet e panevojshme për shkak se ka vështirësi qarkullimi në rrugët e kësaj komune.

“Të nderuar qytetarë të Komunës së Drenasit, pas reshjeve të fundit të borës, rrugët janë vështirësuara për qarkullim, ndonëse kompanitë e kontraktuara janë në teren për të lehtësuar qarkullimin, kryesisht në zona më të thella rurale”, thuhet në njoftimin e Komunës së Drenasit.

Më tej në njoftim thuhet se dy kompanitë e kontraktuara janë duke pastruar borën, fillimisht në zonat me të thella rurale për të vazhduar edhe në të gjitha pjesët tjera ku janë të obliguara sipas kontratës.

Lexo po ashtu Bllokime rrugësh e aksidente pas reshjeve të borës - apelohet për kujdes

Java e parë e stinës së pranverës do të jetë me borë dhe temperatura të ulëta. Kështu ka njoftuar Instituti Hidrometeorologjik i Kosovës.

Sipas IHK-së, bora e cila po bie do të vazhdojë edhe në pjesën e parë të javës së ardhshme por intensiteti do të dobësohet nga e marta.

Instituti Hidrometeorologjik i Kosovës ka theksuar se temperaturat minimale gjatë këtyre pesë ditëve të ardhshme do të lëvizin ndërmjet -4 deri 0 gradë Celsius, ndërsa maksimalet e ditës parashihen të lëvizin ndërmjet 2-11 gradë Celsius si dhe do të fryjë erë nga veriperëndimi dhe jugperëndimi me shpejtësi 1-9m/s.

“Sa i përket situatës biometeorologjike ajo mbetet e pafavorshme për personat me sëmundje kronike, ndërsa cilësia e ajrit paraqitet relativisht e mirë për shkak të aktivitetit të vazhdueshëm të këtyre elementeve meteorologjike”, thuhet në njoftimin e tyre.