Rama takon kryeministrin japonez, pritet emërimi i një ambasadori për Ballkanin Perëndimor

Kryeministri i Shqipërisë Edi Rama u prit sot në takim nga Kryeministri i Japonisë Fumio Kishida në Tokio.

Në një deklarate të përbashkët për media, kryeministri Rama foli për bashkëpunimin për të dënuar agresionin rus në Ukrainë.

Shqipëria dhe Japonia kanë bashkuar forcat për të mbështetur Ukrainën, shtoi ai.

“Ne jemi bashkë në Këshillin e Sigurimit dhe siç thatë ju, ne kemi bashkuar forcat për të mbështetur Ukrainën dhe bashkërisht dënojmë agresionin rus. Është një shkelje totalisht e papranueshme e së drejtës ndërkombëtare dhe një sulm totalisht i papranueshëm ndaj integritetit territorial të një vendi tjetër. Kështu që ne do të vazhdojmë të punojmë krah për krah me miqtë dhe aleatët japoneze në Këshillin e Sigurimit dhe jemi shumë të nderuar që e bëjmë këtë”, tha Rama.

“Siç e përmendi kryeministri, ne e kemi parë me shumë interes strategjinë e Mbrojtjes Kombëtare që ai ka bërë dhe i shpreha vlerësimin tim më të thellë për këtë dokument të thellë që mbulon çështjet e kësaj kohe të vështirë në një mënyrë shumë frymëzuese”, u shpreh Rama.

Në fund, kryeministri Rama ftoi homologun japonez për të vizituar Shqipërinë.

Në anën tjetër, kryeministri japonez deklaroi sot se Japonia do të ngarkojë edhe një ambasador për Ballkanin Perëndimor.

Kishida tha se, “zbatimi i paqes rajonale dhe prosperiteti i Ballkanit Perëndimor, përfshirë Shqipërinë, është i rëndësishëm jo vetëm për Evropën, por edhe për komunitetin ndërkombëtar, përfshirë Japoninë. E parë nga një perspektivë e tillë, lidhur me Marrëveshjen e Bashkëpunimit të Ballkanit Perëndimor, Japonia përkrah shtimin e përpjekjeve për reforma nga ana e vendeve të Ballkanit Perëndimor, në ambicien e tyre për të hyrë në Bashkimin Evropian”.

Dhe në këtë kuadër, theksoi ai, “Japonia do të ngarkojë edhe një ambasador për Ballkanin Perëndimor. Së bashku me kryeministrin Rama, ne do t’i diskutojmë këto iniciativa nga Japonia dhe rëndësinë e rolit të Shqipërisë në promovimin e pajtimit ndëretnik”.

“Ne do të diskutojmë edhe çështje ndërkombëtare të sigurisë, përfshirë rajonin e Paqësorit dhe rajone të tjera. Synoj t’i shpjegoj kryeministrit strategjinë tonë të sigurisë kombëtare dhe të miratuar nga qeveria jonë përballë një situate të tillë. Tashmë, kam gjetur një mirëkuptim paraprak gjatë takimit dhe gjatë diskutimeve me kryeministrin Rama dhe ne do të flasim edhe për forcimin e bashkëpunimit mes dy vendeve tona”, tha Kishida.

Kryeministri i Japonisë, Kishida theksoi se, gjatë takimit ne ramë dakord të dënojmë me forcë agresionin rus kundër Ukrainës, që është një shkelje e hapur e ligjit ndërkombëtar, një shkelje e sovranitetit dhe e integritetit territorial të Ukrainës.

“Si një vend që është goditur nga bombat atomike gjatë Luftës së Dytë Botërore, Japonia nuk mund të pranojë kurrë kërcënimet ruse mbi përdorimin e armëve bërthamore. Ne jemi për të bashkëpunuar në partneritet me komunitetin ndërkombëtar dhe për të dhënë një mesazh të qartë për këtë. Gjithashtu, unë theksova, se Japonia si kryesuese e G7-s gjatë këtij viti do të nxisë çuarjen përpara të vendosjes së sanksioneve të forta për Rusinë dhe dhënien e asistencës për Ukrainën. Ne ramë dakord se jemi dy vende që duhet të vazhdojmë të punojmë ngushtësisht, përfshirë një rezolutë që do të miratohet nga Asambleja e Përgjithshme e OKB-së”, tha ai. /Telegrafi/