Rama mban premtimin, i shoqëron në shkollë dy fëmijët që i shpëtuan mrekullisht tërmetit

Kryeministri Edi Rama ka mbajtur premtimin e dhënë ndaj dy vogëlushëve, Alesios dhe Aurelit.

Këtë të hënë, siç edhe kishte deklaruar, ai i mori me makinë dy djemtë për t’i shoqëruar në ditën e tyre të parë të shkollës, pas ndërprerjes nga tërmeti i 26 nëntorit.

Rama lajmin e ka bërë të ditur me anë të një videoje në Facebook.

“Me Aurelin dhe Alesjon, në ditën e parë të shkollës, Ju uroj të gjithëve një javë të mbarë”, shkruan Rama.

“Duhet të jeni kampion në mësime”, i porositi Rama, ndërsa udhëtonin për në shkollë.

Dy fëmijët janë nxënës të shkollës 9-vjeçare “Ahmet Zogu” në Kamëz.

Lexo po ashtu Ronaldo dhe Buffon ua bëjnë ëndrrën realitet dy djemve që i shpëtuan tërmetit në Shqipëri, gëzojnë fëmijët me përqafime dhe dhurata

Aureli është në klasën e parë dhe u prit nga shokët dhe shoqet që i uruan mirëseardhje. Më pas, Rama e dorëzoi Alesion në klasën e pestë, të cilin po ashtu e pritën nxënësit e klasës.

Të dy djemtë vinë nga Thumana. Pavarësisht humbjeve tragjike që patën në familjet e tyre, ata i shpëtuan mrekullisht tragjedisë së 26 nëntorit. /Telegrafi/