Qeveria thotë se ka mjete financiare për festimin Ditës së Pavarësisë së Kosovës

Për mënyrën shpenzimit të mjeteve financiare të fondit rezervë nga ana e Qeverisë Haradinaj, shpesh herë ka pasur kritika nga shoqëria civile për ‘shterjen’ e këtij fondi në mënyrë jo të drejtë. Për vitin që lamë pas kjo qeveri ka harxhuar fondin e kësaj kategorie prej 6 milionë e 100 mijë euro, ndërsa për dy muajt e parë të vitit 2020 fondi i rezervës është 1.2 milion euro, i paraparë nga 1/12 e ligjit të buxhetit 2019.

Në janar të këtij viti, në mbledhjen e fundit të qeverisë në dorëheqje, janë ndarë mjete financiare në vlerë prej 250 mijë euro nga nën-programi për shpenzime të pa parashikuara për përkrahjen e koalicionit Global Kundër ISIS/DAESH.

Zëvendësministri në detyrë i Financave, Fatmir Gashi thotë në një intervistë për KosovaPress, se edhe pse nuk është miratuar buxheti për vitin 2020, këto mjete të cilat u ndanë ditë më parë për koalicionin Global ISIS në vlerë prej 250 mijë euro janë ndarë nga fondi rezervë që aktualisht është 1 milion e 200 mijë euro nga 1/12 e ligjit të buxhetit për vitin 2019.

Gashi thotë se për vitin që lamë pas është shpenzuar e tërë rezerva në vlerë prej 6 milionë e 100 mijë euro.

“Në atë fond kanë mbetur mjete sikur krejt fondet tjera, 1/12 e tij është edhe në këta dy muajt të parë. 1/12 e fondit që ka qenë 6 milionë e 100 mijë që i bie diku 600 mijë euro janë për muajin e parë të këtij viti për me i shfrytëzuar, ato mund të shfrytëzohen, por nuk do të thotë që duhet të shfrytëzohen për gjithçka, por mund të shfrytëzohen për rastet kur ka nevojë shfrytëzimi i tyre”, deklaron Gashi.

Për mënyrën dhe shumën e shpenzimit të parave nga rezerva, Gashi thotë është vazhdimësi e qeverive parapake.

Megjithatë, kanë mbetur edhe më pak se një muaj deri në festimin e përvjetorit të 12-të të pavarësisë së Kosovës, Gashi thotë se mjetet financiare do të sigurohen nga rezerva, por që nuk tregon se sa është ajo shumë.  Kujtojmë se për vitin paraprak, Qeveria kishte paraparë 600 mijë euro për festimin e Pavarësisë.

“Ka qenë një mënyrë në kontinuitet i ndarjes, prej vitit 2014 për shfrytëzimin e rezervës është për afërsisht e njëjtë, sillet prej 4 milionë e 900 mijë ku ka qenë më e ulëta, deri 8 milionë e 100 mijë dhe sivjet (2019) ka qenë 6 milionë e 100 mijë. Është një kontinuitet i shfrytëzimit. Nëse e analizojmë mirë, më shumë ka mosplanifikim të mirë të buxhetit dhe detyrim pastaj për shfrytëzim të atij fondi se sa që ka diçka tjetër… 1/12 e buxhetit është dhe për 17 shkurt i kemi mjetet, nuk është problem për ato mjete. Ka mjete për festimin pavarësisë. Është e paraparë me 1/12 e buxhetit. 600 mijë euro janë për muajin e parë edhe 600 mijë për muajin e dytë, kështu që nuk ka problem për festimin”, thotë Gashi.

Duke folur për projektin e shumë përfolur të autostradës së Dukagjinit, zëvendësministri Gashi thotë se në draftimin e buxhetit 2020 nga ana Ministrisë së Financave, ky projekt është paraparë projektim dhe fizibilitet, por jo edhe për ndërtim.

“Unë sa e di projekti i autostradës së Dukagjinit me këtë projektbuxhet është i paraparë vetëm në pjesën e projektimeve, fizibilitetit, e jo si autostradë për ndërtim. Pa përfunduar faza e fizibilitetit, ndikimi socio ekonomik i asaj autostrade, dhe pa u plotësuar të gjitha këto kritere nuk mund të flitet ende për ndarjen e mjeteve buxhetore për autostradë”, thotë Gashi. /kp/Telegrafi/