Qeveria hesht për mostrat e Astrit Deharit, e paqartë se si ato u kthyen në IML

Më shumë se një vit pasi që u zhdukën, mostrat e ish-aktivistit të Lëvizjes Vetëvendosje, Astrit Dehari janë kthyer në mënyrë të paqartë brenda hapësirave të Institutit të Mjekësisë Ligjore. Që nga dje, institucionet përgjegjëse kanë qëndruar të heshtura për këtë rast.

Në fund të vitit 2022 në mënyrë të paqartë ishin zhdukur 12 mostra të ish-aktivistit të Lëvizjes Vetëvendosje nga Instituti i Mjekësisë Ligjore.

Shpjegim për formën se si u zhdukën nuk pati askush atëherë e as tash.

Ashtu siç u zhduken, në mënyrë të mistershme mostrat janë rikthyer në hapësirat e Institutit të Mjekësisë Ligjore.

Këtë ia kanë konfirmuar Televizionit Dukagjini burimet brenda IML-së.

Gjatë së premtes, hetues policorë për orë të tëra kanë kryer kontrolle në frigoriferë të IML-së.

Lexo po ashtu Gjenden mostrat e Astrit Deharit

Institucioni brenda të cilit funksionon IML-ja, që është Ministria e Drejtësisë nuk është deklaruar fare për këtë zhvillim.

Njëjtë, të pa qasshëm kanë qenë edhe drejtuesit e Institutit.

Por, një dyshim që këtë situatë e ka krijuar vet Ministria e Drejtësisë e ka ish-këshilltari për IML-në në këtë ministri, Naim Ramizi.

“Mostrat e Astrit Deharit nuk kanë asnjë vlerë relevante sot. Ato janë mbetje si shumë mbetje tjera që janë në Institut për arsye se mungon ligji për asgjësimin e mostrave që e kalojnë afatin kohor pesë vjeçar. Kjo është lojë dhe Ministria e Drejtësisë ka gisht këtu dhe pikërisht ministrja Albulena Haxhiu dhe vartësit e saj janë duke e manipulu dhe keqpërdorë këtë situatë”, tha Naim Ramizi, ish-këshilltar në MD.

Dehari ishte gjetur i vdekur në qelinë e burgut në Prizren në nëntor të vitin 2016, derisa po mbahej i paraburgosur nën dyshimin se kishte sulmuar ndërtesën e Kuvendit, bashkë me disa aktivistë të tjerë të Vetëvendosjes.

Për zhdukjen e mostrave të tij kishte njoftuar ministrja e Drejtësisë, Albulena Haxhiu, në një konferencë të jashtëzakonshme për media më 8 dhjetor të vitit 2022.