Pushimit të gjatë prej tre muajve i vije fundi, rikthehet Ipko Superliga e Kosovës në futboll

Ipko Superliga e Kosovës në futboll po rikthehet pas një pushimi të gjatë prej tre muajve për shkak të pandemisë Covid-19.

Futbolli në Kosovë u ndalua më 12 mars, teksa skuadrat nuk kishin të drejtë as të stërvitin.

Futbollistët kanë zhvilluar stërvitje individuale gjatë kësaj kohe, ndërsa klubet janë përballur me krizë ekonomike.

FFK, Ministria e Shëndetësisë, IKSHPK dhe Ministria e Kulturës, Rinisë dhe Sportit në bashkëpunim vendosën që klubeve elitare në Kosovë t’iu lejojnë mbajtjen e stërvitjeve nga data 18 maj, ndërsa 5 qershori u vendos për ndeshjen e parë në Superligë.

Skuadrat u akuzuan mes vete gjatë kësaj kohe edhe për rifillim të stërvitjeve para kohe, por publikisht asnjëra nuk e pranoi një gjë të tillë edhe pse u publikuan foto nga mediat e ndryshme.

Por vetëm dy ditë më vonë, futbolli kosovar u prek me rastin e parë me coronavirus, ku rezultoi pozitiv sulmuesi i Dritës, Izair Emini në momentin që po bëhej gati të rikthehej në Kosovë nga Maqedonia e Veriut.

FFK vendosi që t’i testojë të gjitha klubet elitare në Kosovë, ku nuk pati më asnjë rast pozitiv dhe u lejua futbolli pa pengesa.

Ndeshjet e para u zhvilluan në kuadër të gjysmëfinales së Kupës së Kosovës, ku Prishtina mposhti lehtësisht 3-0 Drenicën, ndërsa Ballkani dhe Feronikeli luajtën pa gola 0-0 në Therandë.

Shtëpia më e madhe e futbollit kosovar publikoi edhe emrat e katër skuadrave që ishin kundër rifillimit të futbollit e ato ishin Drita, Ballkani, Flamurtari dhe Dukagjini i Klinës, ku secila nga to kishin shkruar arsyejet e veta pse nuk donin të rinisnin.

Përveç Superligës dhe Kupës së Kosovës, të gjitha garat tjera të futbollit kanë përfunduar para kohe, ku Besa e Pejës dhe Arbëria e Dobrajës kanë siguruar inkuadrimin në elitë.

Këtë edicion nga elita e futbollit kosovar do të largohen katër skuadra, ndërsa tri të tjera do të dalin në garat evropiane gjë që e bënë edhe më interesant vazhdimin e këtij kampionati.

Ipko Superliga do të vazhdoj nga xhiro e 23-të, ndërsa ndeshja e parë pas pauzës tre mujore do të zhvillohet në Podujevë mes Llapit dhe Dukagjinit.

View this post on Instagram

Rikthehet Superliga e Kosovës në futboll pas tre muajve ndalesë?, cila skuadër do të shpallet kampion dhe kush do të luajë në Evropë? ?#TelegrafiSport #SuperligaeKosoves

A post shared by Telegrafi Sport (@telegrafisport) on Jun 5, 2020 at 1:36am PDT

Të shtunën janë në program dy ndeshje të tjera, ku Drita pret Flamurtarin ndërsa Feronikeli është nikoqir i Vushtrrisë.

Ndërkohë ditën e diel, lideri aktual Ballkani i bënë konak Drenicën, Gjilani pret Trepçën ’89 ndërsa Prishtina do të luaj nga ora 18:00 me Ferizajn.

Vlen të theksohet se për momentin të gjitha ndeshjet e futbollit kosovar do të zhvillohen pa praninë e tifozëve deri në një rivlerësim të situatës së pandemisë Covid-19. /Telegrafi/