Pse janë shtuar sulmet ndaj zyrtarëve të Policisë së Kosovës nga qytetarët?

Raportet 24 orëshe të Policisë së Kosovës tregojnë se sulmet ndaj zyrtarëve policorë janë shtuar së fundmi në Kosovë.

Ish-hetues policor dhe ekspertë të sigurisë kanë treguar për RTV Dukagjini pse po vjen drejt tek një sjellje e tillë, prej qytetarëve ndaj zyrtarëve policor.

Ish-hetuesi policor, Hilmi Canolli, ka folur për sfidat e komunikimit mes Policisë së Kosovës dhe qytetarëve, duke theksuar se sjellja e qytetarëve ndaj policëve nuk është gjithmonë problematike, por ndodhin raste të veçanta kur mungesa e përvojës tek gjeneratat e reja të policisë mund të krijojë tensione.

“Polici duhet të sigurojë vendin e ngjarjes dhe të ruajë sigurinë e tij. Në disa raste, mungesa e përvojës dhe emocionet e policëve të rinj mund të ndikojnë në nivelin e tyre të sigurisë, duke shkaktuar situata të tensionuara”, ka deklaruar Canolli.

Ai ka shtuar se qytetarët duhet të respektojnë rregullat, si qëndrimi në veturë kur ndalen nga policia, për të shmangur konflikte të panevojshme.

Eksperti i sigurisë, Arben Dashevci, ka theksuar se Policia e Kosovës është organi kryesor i sigurisë në vend dhe buron nga populli.

Ai ka bërë thirrje për respekt më të madh ndaj policëve, duke theksuar se sulmi ndaj tyre është sulm ndaj shtetit.

“Në vitin 2024, janë raportuar mbi 2,000 ankesa ndaj policisë, nga të cilat disa janë adresuar me suspendime dhe masa ligjore”, ka thënë Dashevci, duke shtuar se çdo shkelje nga ana e policëve trajtohet me seriozitet.

Ndërsa avokatja Fehmije Gashi-Bytyqi ka vënë theksin tek aspekti ligjor, duke rikujtuar se pengimi apo sulmi ndaj personit zyrtar përbën vepër penale dhe ndëshkohet me burgim deri në pesë vite.

“Policia e Kosovës është institucioni më i besueshëm në vend dhe duhet të respektohet. Nëse qytetarët ndihen të cenueshëm nga ndonjë veprim policor, ata duhet të ndjekin rrugët ligjore, jo të reagojnë me dhunë”, ka deklaruar ajo.

Përfundimisht, të gjithë ekspertët janë pajtuar se respekti reciprok mes qytetarëve dhe Policisë së Kosovës është kyç për një shoqëri të sigurt dhe funksionale.

Ndryshe një person ishte arrestuar në fillim të këtij muaji në Prizren pasi kishte sulmuar një zyrtar policor derisa ky po e verifikonte pasi figuronte në listën e personave në kërkim.

Sipas njoftimit policor, i dyshuari është arrestuar dhe me vendim të prokurorit është dërguar në mbajtje në dënimit pasi kishte dy urdhërarreste aktive.

Polici i lënduar ka pranuar trajtim mjekësor, e rasti është iniciuar si “sulm ndaj personit zyrtar në kryerje të detyrës zyrtare”./Telegrafi/