Protestojnë punëtorët e sigurimit fizik, KEK: Këta persona nuk kanë kontratë pune me korporatën

Punëtorët e sigurimit fizik në Korporatën Energjetike të Kosovës (KEK) kanë protestuar para objektit të kësaj kompanie dhe të Qeverisë së Kosovës. Ata kanë kërkuar kthimin si punëtorë të KEK-ut dhe jo të tenderohen vazhdimisht siç thanë jashtëligjshëm në sektorin privat. Si shenjë pakënaqësie ata hodhën edhe vezë para zyrave të KEK-ut në kryeqytet.

Lidhur me këtë ka reaguar KEK, duke thënë se punëtorët në fjalë nuk kanë asnjë mundësi të figurojnë të jenë punëtorë të subjektit juridik KEK.

“Në bazë të dokumentacionit që posedojmë, asnjë nga ish-punëtorët e kësaj ish-njësie të shthurur në vitin 2004 nuk kanë kontratë pune me KEK. Në këto rrethana, nga aspekti ligjor, punëtorët në fjalë nuk kanë asnjë mundësi të figurojnë të jenë punëtorë të subjektit juridik KEK, pasi që ata kanë kaluar tek kompanitë private para se të regjistrohej KEK si korporatë në vitin 2005”, thuhet në reagimin e KEK-ut.

Lexo po ashtu Protestojnë punëtorët e sigurimit fizik të KEK-ut, hedhin vezë para zyrave të korporatës në kryeqytet

Sipas tyre, shërbimet e sigurimit ofrohen vetëm nga kompanitë private.

“KEK vlerëson se Ligji për Shërbimet Private të Sigurisë parasheh që shërbimet e sigurimit ofrohen vetëm nga kompanitë private të sigurimit, të licencuara dhe të autorizuara në pajtim me këtë ligj dhe shërbimet e sigurimit ushtrohen vetëm përmes punëtorëve të licencuar të sigurimit në pajtim me këtë ligj. Mbi këtë bazë, KEK as nuk është i licencuar dhe as që ka mundësi për te aplikuar për licencim”, vijon reagimi.

Në fund, KEK thekson se nuk ka asnjë mundësi ligjore për ri-organizimin e këtij shërbimi në kuadër të korporatës. /Telegrafi/