“Promovimi i turizmit rural në Maqedoni nuk ofrohet mjaftueshëm nga operatorët turistik”

Pronarët e kapaciteteve turistike në mjediset rurale nuk janë të kënaqur me promovimin e turizmit rural në Maqedoni.

Kështu thonë nga Koalicioni rural, duke u ankuar se operatorët turistik kombëtar dhe rural nuk i ofrojnë mjaftueshëm kapacitetet rurale si atraksion rural, nuk bashkëpunojnë me komunat, e as me Qendrat për zhvillim të rajoneve planore, shkruan Telegrafi Maqedoni.

Hulumtimi i këtij koalicioni, i realizuar nga muaji mars, e deri në muajin prill të këtij viti, tregon se 78% e mbi 120 kapaciteteve, nuk kanë të dhëna për ekzistimin e Strategjisë kombëtare për turizëm rural, edhe pse e njëjta është miratuar në vitin 2012.

Gjithashtu, 88% e të pyeturve nuk e njohin turizmin rural si pjesë e politikës industriale. Vetëm 12% kanë të dhëna për masa dhe programe që mbështetin zhvillimin e turizmit rural. Vetëm 4% kanë aplikuar për shfrytëzim mjetesh nga shteti, edhe atë për IPARD dhe për Programin për zhvillim rural. Në arsyen e mosaplikimit qëndron aspekti i mosinformimit./Telegrafi/