Më 3 shtator 2025 janë raportuar disa raste të dhunës në familje në komunat e Graçanicës, Obiliqit dhe Prishtinës, ku si të dyshuar figurojnë si burra ashtu edhe gra.
Në Graçanicë, rreth orës 00:30, një burrë është raportuar si i dyshuar për ushtrim dhune ndaj anëtarëve të familjes. Palët janë shoqëruar në stacionin policor, dhe pas inicimit të rastit, me vendim të prokurorit janë liruar në procedurë të rregullt.
Në Obiliq, rreth orës 11:30, dy burra janë shoqëruar në stacionin policor nën dyshimin për dhunë ndaj një gruaje. Edhe në këtë rast, pas intervistimit dhe konsultimit me prokurorin, të dyshuarit janë liruar në procedurë të rregullt.
Në Prishtinë janë raportuar dy raste të ndara gjatë orës 16:00. Në njërin rast, një grua është arrestuar pasi dyshohet për dhunë në familje ndaj anëtarëve të saj. Pas intervistimit, me vendim të prokurorit, ajo është dërguar në mbajtje.
Në rastin tjetër në kryeqytet, dy persona janë shoqëruar nga njësitë policore pas një konflikti të ndërsjellë, ku dyshohet se kanë ushtruar dhunë ndaj njëri-tjetrit. Pas intervistimit, të dy janë liruar në procedurë të rregullt me vendim të prokurorit.
Policia e Kosovës ka apeluar për vetëpërmbajtje dhe raportim të menjëhershëm të rasteve të dhunës në familje, duke ritheksuar se dhuna nuk është zgjidhje dhe se secili rast do të trajtohet me prioritet. /Telegrafi/
