Preteni: Kosova nuk rrezikohet nga sulmet frontale, mund të ketë vetëm ndonjë individual

Ish-ushtaraku Hasan Preteni ka vlerësuar se Kosova është e sigurt sa i përket mundësisë së një sulmi frontal ushtarak nga Serbia.

Ai, në RTV Dukagjini, tha se Kosova është e përgatitur dhe se po ashtu mbështetet nga NATO dhe KFOR-i.

“Kosova nuk është në rrezik nga një sulm frontal, e kemi NATO-n dhe KFOR-in. Kemi një intervistë të ambasadorit amerikan që kategorikisht e ka refuzuar një gjë të tillë, Amerika qëndron mbrapa Kosovës. Nuk mund të ketë sulm frontal, por sulm individual”, tha ai.

Tutje, ai tha se AKI-ja vazhdimisht dërgon raporte te kryeministri dhe Presidentja sa i përket situatës së sigurisë, porse ato nuk bëhen publike për shkak të konfidencialitetit.

Preteni theksoi se nuk duhet të dilet publikisht të thuhet se Policia i ka kushtet e këqija, sepse ndikon negativisht në aspektin e sigurisë.

“Jam i sigurt që jemi në nivel të detyrës, një element negativ, nuk është mirë një tentim të krijimit të defetizmit në strukturat tona, nuk guxon të ketë asnjë informatë për pozicionin tonë të keq. Se Policia i ka pagat e vogla, nuk ka pajisje, është e lodhur, nuk duhet të dalim të themi kështu. Duhet të jemi unikë, të dalim me informata nuk na duhet”, tha ai.