Përulësia dhe ana e ndjeshme e Floyd Mayweather, i cili humbi ish-gruan dhe xhaxhanë në muajin mars

Si rrallëherë, Floyd Mayweather ka treguar anën e ndjeshme dhe të përulur të karakterit të tij, përmes një video-mesazhi të publikuar në Instagram në periudhën e pandemisë së coronavirusit.

Boksieri i pamposhtur ka thënë se e ka pasur të vështirë të deklarohet lidhur me përjetimet e tanishme, duke qenë se ka pasur dy humbje të mëdha në familjen e tij.

Në muajin e kaluar, 43-vjeçari përjetoi dy tragjedi. Atij i vdiq ish-gruaja Josie Harris dhe xhaxhai, njëherësh trajneri i tij, Roger Mayweather.

Derisa Floyd po vuan nga humbjet personale, bota është izoluar si pasojë e përhapjes së COVID-19, prandaj ai e ka publikuar një video, në të cilën tregon se çfarë do të bëjë për t’i ndihmuar të tjerët.

https://www.instagram.com/p/B_d5lxhFrcZ/

“Nuk kam mundur që të dal dhe të flas me botën, të flas me njerëzit. Jam përballur me shumë gjëra. Jam përballur me vdekjen e nënës së fëmijëve të mi, ajo ka qenë shumë e veçantë, një grua e shkëlqyer dhe një person i mrekullueshëm”.

“Si dhe përballja me vdekjen e një trajneri të shkëlqyer, një xhaxhai, një figure atërore, Roger Mayweather. Jam përballur me shumëçka deh nuk kam mundur të dal dhe të flas me botën”, ka thënë boksieri.

https://www.instagram.com/p/B9uxNkSFj1V/

Ish-gruaja e Floyd, nëna e tre fëmijëve të tij, u gjet e vdekur në një veturë nga policia në Kaliforni në muajin mars. Lidhja e tyre që ka zgjatur nga viti 1995 deri në vitin 2010 ka qenë turbulente, ndërsa para dhjetë vitesh Mayweather qëndroi dy muaj në burg për dhunë familjare ndaj saj.

Vetëm disa ditë pas vdekjes së saj, boksieri u përball me një humbje tjetër. Xhaxhai i tij, me të cilin ishte shumë i lidhur, ndërroi jetë në moshën 58 vjeçare. Roger, i cili u pensionua nga boksi aktiv në vitin 1999, në vitet e fundit të jetës së tij kishte vuajtur nga shëndeti i dobët, duke përfshirë diabetin.

Mayweather, i cili ka një pasuri në vlerë prej 565 milionë euro (522 milionë euro), është zotuar se do t’i ndihmojë njerëzit në periudhën e krizës së coronavirusit.

Lexo po ashtu Varfëria, krimi, droga në familjen e Mayweather dhe rruga e vështirë drejt shndërrimit në boksierin më të pasur (Foto)

“Me gjithçka që po ndodh, unë do të vazhdoj ta bëjë pjesën time. Nuk duhet t’u tregoj të tjerëve se çfarë po bëj. Mund të bëj diçka prapa dyerve të mbyllura, nuk ka të bëjë me paratë”.

“Paratë që i jap do të jenë për t’i ushqyer njerëzit dhe për t’u ndihmuar njerëzve që nuk kanë sa duhet në këtë situatë”.

“Do të vazhdoj të jap dhe nuk do të flas kurrë për këtë. Derisa Zoti e di se po bëj një vepër të mirë, kjo më mjafton”, ka deklaruar boksieri i pensionuar në video-mesazhin e tij. /Telegrafi/