Përfaqësuesit e biznesit kërkojnë që të zbatohen menjëherë të gjitha masat nga Pakoja Emergjente

Oda Ekonomike e Kosovës, Oda Ekonomike Amerikane dhe Këshilli i Investitorëve Evropianë shprehin shqetësimin e tyre lidhur me ndikimin negativ që masat kufizuese në aktivitetin ekonomik me qëllim të parandalimit të përhapjes së pandemisë COVID-19 kanë pasur në ndërmarrjet vendore.

Të tri organizatat që përfaqësojnë interesat e sektorit privat, besojnë që me qëllim të zbutjes së efekteve negative në operacionet e ndërmarrjeve dhe punëtorëve të goditur, qeveria në detyrë duhet të zbatojë në tërësi dhe sa më shpejtë të jetë e mundur të gjitha masat nga Pakoja Emergjente Fiskale.

OEK, OEAK dhe KIE theksojnë se për shkak të masave kufizuese brenda vendit por edhe në zinxhirët rajonalë e ndërkombëtarë të furnizimeve shumë ndërmarrje prodhuese që operojnë në Kosovë po përballen me vështirësi të shumta ndërsa një numër i tyre edhe kanë ndërprerë aktivitetin e tyre në plotni.

Këto vështirësi, sipas tyre, lidhen edhe me rënien e kërkesës brenda e jashtë vendit në rastin e ndërmarrjeve që eksportojnë. Rënia e të hyrave të këtyre ndërmarrjeve e bën më të vështirë mbulimin e shpenzimeve operative, përfshirë këtu edhe pagat, e kjo rrjedhimisht rrezikon reduktimin e pagesës për punonjësit ose edhe mbylljen e vendeve të punës, por edhe thellimin e deficitit tregtar të vendit.

Për të mbështetur ndërmarrjet eksportuese, edhe ashtu të pakta në numër, Ministria e Financave dhe Transfereve duhet që menjëherë të nisë me zbatimin e masës numër 13 për mbështetjen e eksportuesve në Kosovë, për çfarë kërkohet nga Ministria e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike që me urgjencë të nisë procesin e konsultimit me MFT, KIESA, Administratën Tatimore, Doganën dhe odat ekonomike për përcaktimin e kritereve për ofrimin e përkrahjes për eksportuesit nga Kosova, siç parashihet me planin operacional për zbatimin e Pakos Emergjente Fiskale.

Vonesa në disbursimin e shumës prej 10 milionë eurosh për eksportuesit do ta minimizojë efektin e mundshëm të tyre në ekonomi për shkak të eskalimit të dëmeve te këto ndërmarrje, të cilat kanë luajtur rol të çmueshëm në zhvillimin ekonomik të vendit, në kushte të barrierave të shumta me të cilat janë përballur, si dhe me paragjykime të shumta që lidhen me perceptimin jo të mirë për Kosovën.

Në fund, Oda Ekonomike e Kosovës, Oda Ekonomike Amerikane në Kosovë dhe Këshilli i Investitorëve Evropianë, duke ritheksuar edhe një herë nevojën e veprimit të shpejtë, përsërisin zotimin e tyre të sinqertë për partneritet konstruktiv me qeverinë në detyrë. /Telegrafi/