Pensionistët të pakënaqur, kërkojnë trajtim të dinjitetshëm   

Pensionistët në Prizren janë ankuar se pensionet e tyre nuk mjaftojnë për të përballuar koston e jetesës, ndërkohë që sipas tyre edhe kushtet e kriteret për përfitim të rritjes së pensionit bazë janë të padrejta.

Shqetësimet për këto çështje janë adresuar gjatë një takimi të organizuar nga Partia Turke e Lëvizjes Novatore (YTHP) në Prizren, ku të pranishëm kanë qenë dhjetëra anëtarë të komunitetit të pensionistëve, raporton Telegrafi.

Avokati Refki Taç, ka vlerësuar se kriteret ekzistuese sa i përket pensioneve janë të padrejta, derisa ka theksuar se edhe dispozitat ligjore nuk po gjejnë zbatim.

Ai ka bërë të ditur se neni 14 i Ligjit për skemat pensionale përcakton se pensionet duhet të harmonizohen me koston e jetesës. “Prandaj neni 14 i këtij ligji duhet të zbatohet”, ka thënë ai, duke kërkuar rritjen e ndjeshme të pensioneve.

Pensionistja Jeta Toçila ka përkujtuar se shërbyesit civilë që pensionohen dhe kanë të drejta në përfitimin e 3 ose 6 pagave jubilare kanë probleme, meqë institucionet përkatëse nuk ndajnë buxhet për këtë. “Pastaj përfituesit po obligohen ta realizojnë këtë të drejtë me përmbarues”, ka thënë ajo.

Vërejtje sipas njoftimit të YTHP-së kanë adresuar edhe pensionistët tjerë, ku kryesisht janë ankuar për vlerën e ultë të pensioneve sikurse edhe nevojën e ndryshimit të kriterit për minimumin 15 vjet stazh të sigurimit pensional, që sipas tyre është duke prekur një numër të madh të pensionistëve në mënyrë të padrejtë.

Gjithashtu kanë kërkuar përshtatjen e pensioneve me koston e jetesës përkatësisht duke marrë për bazë normat e inflacionit dhe të ardhurat kombëtare, raporton Telegrafi.

Kryetari i YTHP-së, Ertan Simitçi ka bërë të ditur se qëllimi kryesor i këtij takimi ka qenë që të dëgjohen problemet, kërkesat, ankesat dhe sugjerimet e pensionistëve, në mënyrë që bashkërisht të shqyrtohen zgjidhjet për problemet e tyre. “Ne do të kërkojmë që kriteri për 15 vjet stazh të sigurimit pensional të ndryshohet përkatësisht të hiqet, ndërkohë që edhe pensioni bazë të jetë sa paga minimale, e pastaj të ketë shtesa bazuar në kontributet apo nivelin e arsimit”, ka thënë Simitçi.

Edhe nënkryetari i kësaj partie, Sharik Xhibo ka pohuar se solidarizohet me kërkesat e pensionistëve dhe se do të kërkohet zgjidhje për to.

Krerët e YTHP-së kanë pohuar se takime të këtilla do të realizohen edhe në të ardhmen./Telegrafi/