Sabit Januzi shprehet i penduar gjatë seancës në Hagë: Nuk me vjen mirë për gjestin që e kam bërë

Sabit Januzi ka shprehur pendesë në Hagë lidhur me veprat për të cilat u deklarua fajtor.

Ai pranoi se ndjen keqardhje për veprimet e tij gjatë asaj kohe.

“Duke marrë parasysh se takimi im me dëshmitarin e Prokurorisë përbën pengim të drejtësisë, është e qartë që nuk më vjen mirë për atë gjë. Ndoshta nuk jam jurist dhe nuk e kam marrë parasysh atë gjë me kohë, por nuk më vjen mirë për gjestin që kam bërë,” tha Januzi gjatë seancës.

Ai shtoi se tani e kupton që sjellja e tij ishte e gabuar dhe theksoi se nuk do të përsëriste të njëjtat veprime.

“Tani, kur e kuptoj rëndësinë e saj, sigurisht që nuk do ta bëja,” u shpreh ai.

Avokati i Januzit, Jonathan Elystan Rees, deklaroi se klienti i tij është penduar për veprimet e tij dhe këtë e ka reflektuar gjatë kohës që ka qenë në paraburgim.

Prokurorja propozoi disa ndryshime të vogla në marrëveshjet për tre të akuzuarit, ndërsa kryegjyqtarja ftoi mbrojtësit të bëjnë parashtrime për të vendosur për këtë çështje.

Ndërkohë, nesër pritet të mbahet seanca për marrëveshjen e fajësisë ndaj Ismet Bahtijarit, e cila do të fillojë në orën 13:00.