Pasi i vënë zjarrin aeroplanit, rebelët me hark dhe shigjeta në rajonin e largët të Papuas marrin peng pilotin e Zelandës së Re – kanë një kërkesë për Indonezinë

Rebelët në rajonin e Papua-s Perëndimore të Indonezisë kanë publikuar një seri pamjesh të tyre në të cilat thuhet se shihen me një pilot që u mor peng javën e kaluar.

Sipas mediave të huaja, përcjell Telegrafi, Phillip Mark Mehrtens, nga Christchurch, Zelanda e Re, u kap të martën e kaluar nga “luftëtarët e pavarësisë”.

Ata sulmuan aeroplanin e tij me një motor, menjëherë pasi ai u ul në një aeroport të vogël në Paro.

Aeroplani, i operuar nga kompania indoneziane e aviacionit Susi Air, mbante pesë pasagjerë dhe rreth 450 kg furnizime minierash.

Rebelët liruan pasagjerët indigjenë papuan dhe i vunë zjarrin aeroplanit, tha zëdhënësi i rebelëve Sebby Sambom.

Piloti ishte planifikuar të merrte 15 punëtorë ndërtimi që kishin ndërtuar një qendër shëndetësore në Paro pasi një grup rebelësh, të udhëhequr nga Egianus Kogoya, i kishin kërcënuar se do t’i vrisnin, tha shefi i qarkut Nduga, Namia Gwijangge.

Gwijangge, i cili ishte një nga pasagjerët, tha: “Plani ynë për të evakuuar punëtorët zemëroi rebelët, të cilët u përgjigjën duke i vënë zjarrin aeroplanit dhe duke kapur pilotin.

“Na vjen thellësisht keq për këtë incident”.

Grupi publikoi imazhe të disa personave të armatosur që i vunë zjarrin aeroplanit në pistë.

I ulur në kabinën e aeroplanit, Kogoya tha se ai mori peng pilotin si pjesë e luftës së tyre ‘për të çliruar Papua-n’ nga Indonezia.

Një video tjetër tregoi një burrë të identifikuar si Mehrtens duke qëndruar në një pyll të rrethuar nga një grup njerëzish të armatosur me pushkë, shtiza dhe harqe e shigjeta.

Në një video të tretë, ai u urdhërua nga rebelët të thoshte: “Indonezia duhet të pranojë se Papua është e pavarur”.

Ministri koordinues për çështjet politike, sigurinë dhe ligjore, Mohammad Mahfud tha se qeveria po bënte çdo përpjekje për të bindur rebelët të lironin Mehrtens “sepse prioriteti është siguria e pengut”. /Telegrafi/