Arrestimi i asamblistit të LVV-së për narkotikë, Abdixhiku fton Prokurorinë e Shtetit ta hetojë rrjetin

Kryetari i Lidhjes Demokratike të Kosovës (LDK), Lumir Abdixhiku ka reaguar pas arrestimit të asamblistit të LVV-së, Besnik Mujeci i dyshuar për posedim të substancave narkotike (ekstazi).

Abdixhiku përmes në postimi në rrjetin social në Facebook ka shkruar se synimet e LVV-së muaj më parë për kapjen e ndërmarrjeve publike ne kryeqytet është tentativë e trishtë dhe e dështuar.

“Muaj më parë, Lëvizja Vetëvendosje kishte provuar me pazaret më të pabesueshme të mundshme, të përmbyste vullnetin e qytetarëve të Prishtinës, duke kapur ndërmarrjet publike të Kryeqytetit.

Kjo tentativë e trishtë e tyre, kishte dështuar pa nisur mirë; ndonëse përballë na shpërfaqeshin grupet kriminale më të çuditshme. Se si ishin bërë bashkë të gjithë kundër shumicës sonë; ishte sa dëshpërim për nivelin politik në vend, aq dhe befasi. Kishte një interes që nuk e kuptonim dot atëherë.

Synim asokohe – ndër të tjerash – ishte dhe marrja e Stacionit të Autobusëve të Kryeqytetit.

Sot, teksa një asambleist i tyre është arrestuar me plot 11 mijë doza narkotikësh në vlerë prej gjysmë milioni euro; si pjesë e një rrjeti që me linjat e autobusëve Prishtinë – Tiranë bartnin narkotikë në vazhdimësi; nuk ka se si të mos rikujtojmë insistimin e opozitës së Kryeqytetit, Lëvizjes Vetëvendosje, për ta vendosur të njëjtin asambleist – pikërisht këtë pra – si aksionar në këtë Stacion. Jo Termokos, Prishtina Parking, NPB, Pallat të Rinisë apo dhe secilën ndërmarrje tjetër në Kryeqytet, por vetëm në Stacion; aty ku linjat e autobusëve niseshin për çdo ditë”, ka shkruar Abdixhiku.

Lexo po ashtu Vetëvendosje nis procedurë disiplinore ndaj asamblistit Mujeci, i cili dyshohet se u kap me drogë në Shqipëri

E, që sipas tij pazaret e tilla duket se kanë pasur një qëllim më të thellë. “Prandaj dhe grupet, prandaj dhe nisma, prandaj dhe insistimi atëherë”.

Ai po ashtu ngriti dyshime se ekziston një rrjet i cili merret me bartjen e narkotikëve.

I pari i LDK ka ftuar Prokurorinë e Shtetit të hetojë këtë rrjet, në veçanti njerëzit e përfshirë në këtë skemë dhe mbështetjen politike që kanë marrë në gjithë këtë proces.

“Qytetarët e Prishtinës i sigurojmë se bandat e tilla narkotike, s’do të kenë asnjëherë hapësirë në Kryeqytet. Prishtina e para ka provuar mashtruesit, e para është liruar nga ta. Po punojmë, nëpërmjet ‘Rrugës së Re’ për përfundim të njëjtë në gjithë Kosovën”, ka shkruar ndër të tjera Abdixhiku. /Telegrafi/